सरकारले भूउपयोग नीति परिमार्जन गर्दै, माग्यो राय सुझावहरु

काठमाडौं । सरकारले भूउपयोग नीति, २०७२ परिमार्जन गर्न गृहकार्य थालेको छ । भूमि व्यवस्था मन्त्रालयले यसका लागि राय सुझाव उपलब्ध गराइदिन सरोकारवालाहरुलाई सार्वजनिक सूचना जारी गरी आह्वान गरेको छ ।

आगामी पुस मसान्तसम्म आफ्नो राय सुझावहरु भूमि व्यवस्था मन्त्रालयको आधिकारिक इमेलमार्फत उपलब्ध गराउन सकिने छ । 

परिवर्तनशील सामाजिक(आर्थिक परिदृश्य, द्रुत शहरीकरण, प्राकृतिक स्रोतहरुको दोहन र जलवायु परिवर्तनका कारण भूमिको प्रभावकारी उपयोगलाई सम्बोधन गर्न भूउपयोग नीति, २०७२ मा पुनरावलोकन गरी परिमार्जन गर्न आवश्यक देखिएको मन्त्रालयले जनाएको छ ।

चालू आर्थिक वर्षमा उक्त नीति परिमार्जन गर्ने कार्य प्रारम्भ गरिएको मन्त्रालयद्धारा प्रकाशित सूचनामा उल्लेख छ । भूउपयोग नीतिलाई थप प्रभावकारी एवं कार्यान्वयनयोग्य बनाउन सरोकारवालाहरुको चासोको विषयहरुलाई समेत समावेश गरी परिमार्जन गर्न उपयुक्त हुने देखिएको मन्त्रालयले जनाएको छ ।