८ महिनामा काठमाडौं उपत्यकाभित्र २९ हजार घरजग्गा कारोबार

काठमाडौं । चालु आर्थिक वर्षको पहिलो आठ महिना (साउनदेखि फागुनसम्म) मा काठमाडौं उपत्यकामा घरजग्गा कारोबार सामान्य बढेको छ । 

आठ महिनाको अवधिमा उपत्यकामा रहेका नौवटा मालपोत कार्यालयबाट २८ हजार ७७८ घरजग्गाको लिखत पारित भएको भूमि व्यवस्थापन तथा अभिलेख विभागले जनाएको छ । 

गत आर्थिक वर्षको सोही अवधिमा उपत्यकामा २८ हजार ३१६ घरजग्गाको लिखत पारित भएका थिए । गत आवभन्दा चालु आवमा ४६२ घरजग्गा कारोबार बढी भएको विभागको तथ्यांकले देखाउँछ । 

कुन महिना कति ?

उपत्यकामा साउन महिनामा सबैभन्दा धेरै घरजग्गा किनबेच भएका छन् । भूमि विभागका अनुसार साउनमा उपत्यकामा ३९ सय २१ घरजग्गा कारोबार भएको देखिन्छ ।

त्यसपछि भदौ, असोज र कार्तिकमा उपयत्काको घरजग्गा कारोबार निरन्तर घटिरहेको देखिन्छ । भदौमा ३६ सय २३, असोजमा ३१ सय ९४, कार्तिकमा २७ सय नौ सय घरजग्गा कारोबार भए । 

मंसिरदेखि भने उपत्यकाभित्र कारोबार निरन्तर बढ्दै गइरहेको देखिन्छ । विभागका अनुसार मंसिरमा ३६ सय ६२, पुसमा ३८ सय ८९, माघमा ३८९० र फागुनमा पनि ३८ सय ९० घरजग्गा कारोबार भएका छन् ।

भक्तपुर मालपोतबाट सबैभन्दा धेरै किनबेच

काठमाडौं उपत्यकाका तीन जिल्लामा नौ मालपोत कार्यालय छन्, जसम्धये भक्तपुरमा एक, ललितपुरमा दुई र काठमाडौंमा ६ रहेका छन् । 

आठ महिनाको अवधिमा सबैभन्दा धेरै भक्तपुर मालपोत कार्यालयबाट घरजग्गा किनबेच भएको देखिन्छ । भक्तपुरबाट ६ हजार ७६७ घरजग्गा किनबेच हुँदा ललितपुरको लगनखेल मालपोतबाट ६ हजार २८७ घरजग्गा किनबेच भएका छन् ।

सबैभन्दा कम ललितपुरको गोटीखेल मालपोतबाट किनबेच भएको देखिन्छ । यो मालपोतबाट नौ महिनामा ११२ घरजग्गा किनबेच भएका छन् ।

काठमाडौंमा पर्ने डिल्लीबजार मालपोतबाट १४ सय ३१, जावहिलबाट ३४ सय, कलंकीबाट ४६ सय २५, साँखुबाट दुई हजार २३, मनमैंजुबाट २९ सय ४३ र टोखा मालपोतबाट ११ सय ९० घरजग्गा किनबेच भएका छन् ।