काठमाडौं । स्वनिगः नेवारी शब्द हो, जसको अर्थ काठमाडौं (येँ), ललितपुर (यलाः) र भक्तपुर (ख्वपः) समेटिएको काठमाडौं उपत्यका हो । यही परिभाषालाई समेट्ने गरी भक्तपुरको गुण्डुस्थित घ्याम्पे डाँडामा हाई एन्ड लक्जरी रिसोर्ट ‘स्वनिगः’ निर्माण सुरु भएको छ ।

नयाँ वर्षको दिन पारेर गैरआवासीय नेपाली शेष घले, अमृतरत्न शाक्य र सुवर्णकृष्ण श्रेष्ठले रिसोर्टको भूमि पुजा गरे । चार अर्ब ७५ करोड रुपैयाँभन्दा बढी लगानी रहने अनुमान गरिएको टाइम–सेयर मोडलका ६० वटा भिल्लासहित रिसोर्ट सन् २०२७ को नोभेम्बरमा सम्पन्न गर्ने लक्ष्य लिइएको छ ।

इम्प्लिमेन्टिङ एक्सपर्टस् ग्रुप (आईईजी) र एस एन्ड जेजी होल्डिङ्स (अस्ट्रेलिया)ले साझेदारीमा रिसोर्ट निर्माण थालनी गरेका हुन् । आइईजीको प्रतिनिधित्व अमृतरत्न शाक्य र सुबर्णकृष्ण श्रेष्ठले गरिरहेका छन् भने एस एन्ड जेजी होल्डिङ्समा गैरआवासीय नेपाली संघ (एनआरएनए)का पूर्वअध्यक्ष समेत रहेका शेष घले र जमुना घलेको स्वामित्व छ ।

स्वनिगः रिसोर्ट प्रालिले भक्तपुरको गुण्डुस्थित आफ्नो जमिनलाई अत्याधुनिक पाँचतारे सम्पत्तिमा विकास गर्न लागेको जनाएको छ ।

यो महत्वाकांक्षी परियोजनामा एउटा अन्तर्राष्ट्रिय ब्रान्डको पाँचतारे रिसोर्ट, टाइम–सेयर मोडेलका भिल्ला तथा विभिन्न मनोरञ्जन केन्द्रहरू समावेश हुनेछन् । उक्त प्रोपर्टी नयाँ नेपाली ब्रान्ड ‘स्वनिगः’ अन्तर्गत सञ्चालन हुने बताइएको छ ।

स्वनिगः उक्त परियोजनाको लागि उपयुक्त नाम हो, जसले यी सहरहरूमा सहअस्तित्वमा रहेको स्थापत्य (पर्फर्मिङ आर्ट) कला, परम्परागत हस्तकला, खाद्य संस्कृति र इतिहास जस्ता अमूर्त सांस्कृतिक सम्पदासहित परम्परागत संरचनालाई पुनर्निर्माण गर्ने लक्ष्य राखेको छ ।

घनाजंगलले घेरिएको थुम्कोमा रिसोर्ट

यो प्रोपर्टी निर्माणस्थल सुन्दर हिमशृंखला देखिने घना जंगलले घेरिएको पहाडी थुम्कोमा रहेको छ, जुन ‘सुतिरहेका बुद्ध शाक्यमुनि’को अगाडिपट्टि रहे जस्तो देखिन्छ । यहाँबाट उपत्यकाका प्राचीन तीन सहर येँ, यलः र ख्वपःको सुन्दर दृश्य देखिन्छ ।

नेपाली संस्कृति, सम्पदा र संगीतका राष्ट्रिय तथा अन्तर्राष्ट्रिय पारखी र प्रकृतिप्रेमीका लागि स्वनिगः परियोजना उत्कृष्ट गन्तव्य हुनेछ ।

यो परियोजनालाई माइस (मिटिङ, इन्सेन्टिभ, कन्फेरेन्स, एक्जिबिसन), इभेन्ट, अन्तर्राष्ट्रिय सेमिनार, डेस्टिनेसन वेडिङ हब (वैवाहिक कार्यक्रमको गन्तव्य), लाइभ संगीत प्रदर्शनस्थल, एम्फिथिएटर (कला, संस्कृति र संगीतको जीवन्त प्रदर्शन), योग, ध्यान, आध्यात्मिक साधना र रक क्लाइम्बिङ, हाइकिङ, साइक्लिङ जस्ता खेलकुद गतिविधिहरूमा विशेष जोड दिँदै खानपान र स्वास्थ्य तथा मनोरञ्जनका लागि उत्कृष्ट गन्तव्यका रुपमा विकास गर्ने सञ्चालकहरुको लक्ष्य छ ।

यो गन्तव्यले स्थानीय समुदायको उत्थान गर्दै नेपाली र स्थानीय सम्पदाको प्रवद्र्धन गर्ने लक्ष्य राख्ने बताइएको छ । यो परियोजनालाई नेपाली तथा विदेशी पाहुनाका निम्ति बिलासी पर्यटकीय गन्तव्य र गुणस्तरीय तथा स्वस्थ जीवनशैलीमा जोड दिने परिपूर्ण वेलनेस सेन्टरका रुपमा विकास गरिनेछ ।

यसले विश्राम, आध्यात्मिकता, कला/संस्कृति, खेलकुद र लाइफस्टाइल अतिथि सत्कारको अद्वितीय समिश्रण प्रस्तुत गर्ने छ ।

हस्पिटालिटीमा अनुभवी साझेदारहरू

होटलका साझेदार कम्पनी आइईजीले ५० वर्षदेखि मन्दिर, सत्तलजस्ता विशाल संरचनाहरू निर्माण गर्दै अन्तर्राष्ट्रिय प्रदर्शनीहरूमा प्रशंसा र पुरस्कार जितेका छन् । यस्तै, समिट होटल, एयरपोर्ट होटल र निर्माणाधीन ओएसिस होटलमा लगानी गरेर अतिथि सत्कार परियोजनाहरूमा पनि संलग्न छ ।

अर्को साझेदार अस्ट्रेलियाको एस एन्ड जेजी इन्भेस्टमेन्ट्स प्रालि प्रत्यक्ष विदेशी लगानी (एफडीआई) कम्पनी हो । यसमा विश्वव्यापी रूपमा शिक्षा, अतिथि सत्कार तथा रियल स्टेट क्षेत्रमा सक्रिय अगुवा शेष घले र जमुना घले गुरुङको स्वामित्व छ ।

एस एन्ड जेजीले आफ्नो सहायक कम्पनी एमआईटी ग्रुप होल्डिङ्समार्फत यसअघि नै काठमाडौंको मुटु कान्तिपथमा एउटा पाँचतारे होटल निर्माण गरिरहेको छ ।
उक्त बिलासी पाँचतारे होटल यसै वर्षको अन्त्यतिर सञ्चालनमा आउने लक्ष्य छ, जुन अतिथि सत्कार क्षेत्रमा सबैभन्दा धेरै प्रत्यक्ष वैदेशिक लगानी (एफडीआई) रहेको परियोजना हो ।

एस एन्ड जेजीले काठमाडौंबाहिर पनि अन्य पर्यटनसम्बद्ध व्यावसायिक अवसरहरु अध्ययन तथा अन्वेषण गरिरहेको छ । र, ऊर्जा क्षेत्रमा पनि हात हाल्ने यसको लक्ष्य छ ।

Articles By: Nepalhomes

ताजा अपडेट

चैतमा घरजग्गासँगै कित्ताकाट पनि बढ्यो, के अब नयाँ वर्षदेखि लय समाउला ?

चैतमा घरजग्गा कारोबार र राजश्व संकलन बढ्यो, देखियो सुधारको शंकेत

भक्तपुरमा खुल्ने भयो हाइ एन्ड रिसोर्ट 'स्वनिगः', पौने पाँच अर्बमा लक्जरी प्रोपर्टी निर्माण सुरु

नारायणघाटमा सिद्धार्थ हस्पिटालिटीले सुरु गर्‍यो 'सिद्धार्थ होटेल चितवन'

खनाल आयोगको सुझावः नेपालमा विदेशी नागरिकलाई अपार्टमेन्ट खरिद गर्न पाउने व्यवस्था गरौं

पहिलो घरकर्जा लिनेलाई निश्चित अवधिसम्म स्थिर ब्याजदर दिन खनाल आयोगको सुझाव

वर्षान्त २०८१ : होटलमा लगानीको ओइरो, ३५ लाख पर्यटक अटाउने कोठा तयार

भूमिको सदुपयोग गर्दै कसरी उच्च लाभ लिने ? यस्ता छन् खनाल आयोगका १५ सुझावहरु