असारमा वाणिज्य बैंकमा व्यक्तिगत मुद्दती निक्षेपको ब्याजदर औषत ६.८८ प्रतिशत रहेकोमा साउनमा घटेर औषत ६.६४ प्रतिशतमा कायम भएको छ
काठमाडौं । नयाँ आर्थिक वर्षको पहिलो महिना साउनमा पनि निक्षेपको ब्याजदर घट्ने क्रमले निरन्तरता पाएको छ । असारको तुलनामा साउन महिनामा वाणिज्य बैंकमा व्यक्तिगत मुद्दती निक्षेपको ब्याजदर ०.२४ प्रतिशत बिन्दूले घटेको हो ।
असार महिनामा वाणिज्य बैंकमा व्यक्तिगत मुद्दती निक्षेपको ब्याजदर औषत ६.८८ प्रतिशत रहेको थियो । साउन महिनामा ब्याजदर घटेर औषत ६.६४ प्रतिशतमा सिमित भएको छ ।
बैंकमा तरलता (लगानीयोग्य रकम) थुप्रिदै गएपछि बैंकहरुले निक्षेपको ब्याजदर घटाउँदै लगेका हुन् । अहिले वाणिज्य बैंकहरुले साधारण बचतमा तीन प्रतिशत हाराहारी मात्रै ब्याज उपलब्ध गराउन थालेका छन् ।
निक्षेपको तुलनामा कर्जा लगानी अपेक्षित रुपमा बढ्न नसकेको बैंकर बताउँछन् । यतिबेला बैंकिङ प्रणालीमा ६ खर्ब ६१ अर्ब रुपैयाँ तरलता (कर्जा लगानीयोग्य रकम) थुप्रिएर बसेको छ ।
निक्षेपको ब्याजदर घट्दै गएपछि कर्जाको ब्याजदर पनि घट्दै गइरहेको छ । जसको लाभ उपभोक्ता (ग्राहक) लाई हुने देखिन्छ । जेठ महिनामा कर्जाको ब्याजदर घटेर २८ महिना यताकै न्यून बिन्दूमा झरेको राष्ट्र बैंकको तथ्यांक छ ।
एक वर्षअघि ०८० जेठमा वाणिज्य बैंकहरुको कर्जाको औषत ब्याजदर १२.५३ प्रतिशत रहेकोमा ०८१ जेठसम्म २.३८ प्रतिशत बिन्दूले घटेर १०.१५ प्रतिशत कायम भएको छ ।
मुद्दती निक्षेपमा कुन बैंकको कति ब्याजदर ?
साउन महिनामा व्यक्तिगत मुद्दती निक्षेपमा सबैभन्दा धेरै ब्याजदर एनएमबि र एनआइसी एशियाले ७.५३ प्रतिशत दिने भएका छन् ।
मुद्दती निक्षेपमा माछापुच्छ्रे, प्रभु, इन्भेष्टमेन्ट मेगा बैंकले साउनका लागि ७ प्रतिशत ब्याजदर तोकेका छन् । यस्तै, सिटिजन्स र सिद्धार्थ बैंकले ६.७५ प्रतिशत, कुमारीले ६.५१ प्रतिशत, प्राइम कमर्शियल र लक्ष्मी सनराइजले ६.५० प्रतिशत ब्याजदर तोकेका छन् ।
सानिमाले ६.४० प्रतिशत, हिमालयले ६.२५ प्रतिशत, ग्लोबल आइएमईले ६.२५ प्रतिशत, एभरेष्ट र एसबिआइले ६.३० प्रतिशत, नेपाल बैंकले ६.२५ प्रतिशत, राष्ट्रिय वाणिज्य बैंकले ६.२१ प्रतिशत, कृषि विकास बैंकले ६.२९ प्रतिशत ब्याजदर दिने भएका छन् ।