गत आवमा करिव ७८ करोडको मात्रै सिमेन्ट र क्लिंकर निर्यात भएको भन्सार विभागको तथ्यांक छ
काठमाडौं । निर्यात सुरु भएको छोटो अवधिमै सिमेन्ट र क्लिंकरको बढ्दो निर्यातले आशा जगाउन सफल भएको छ ।
चालु आर्थिक वर्षको पहिलो ११ महिनामा तीन अर्ब ६६ करोडको सिमेन्ट र क्लिंकर निर्यात भएको छ । यस आधारमा आर्थिक वर्षभरीमा सिमेन्ट र क्लिंकरको निर्यात चार अर्ब नाघ्ने अनुमान गर्न सकिन्छ ।
गत आवमा करिव ७८ करोडको मात्रै सिमेन्ट र क्लिंकर निर्यात भएको भन्सार विभागको तथ्यांक छ । ०७९ असारमा पहिलो पटक निर्यात भएको सिमेन्ट छोटो अवधिमै सबैभन्दा धेरै निर्यात हुने प्रमुख दश वस्तुहरुमा पर्न थालेको छ ।
पाल्पा सिमेन्टले पहिलो पटक सिमेन्ट निर्यात थालनी गरेको थियो । अहिले सिमेन्ट र क्लिंकर निर्यात गर्ने उद्योगहरु आधा दर्जन नाघिसकेका छन् । सिमावर्ती भारतीय बजारमा नेपाली सिमेन्टको माग बढ्दै गइरहेको देखिन्छ ।
११ महिनाको अवधिमा एक अर्ब ८२ करोडको चार लाख ९६ हजार टनभन्दा बढी क्लिंकर (अर्धप्रशोधित सिमेन्ट) निर्यात भएको छ । यस्तै, एक अर्ब ८३ करोड रुपैयाँ बराबरको २१ लाख ४८ हजार टनभन्दा बढी तयारी सिमेन्ट निर्यात भएको भन्सार विभागले जनाएको छ ।
अहिले नेपालको निर्माण क्षेत्रमा मन्दी लागेका कारण सिमेन्ट, डन्डी, गिट्टी, बालुवा जस्ता निर्माण सामाग्रीको बिक्री सुस्त छ । तर, विकास निर्माणका कामहरु तिब्र गतिमा अगाडि बढाइरहेको भारतमा निर्माण सामाग्रीको माग अत्यधिक रहेको सिमेन्ट उद्योगीहरुको भनाई छ ।
सरकारले सिमेन्ट निर्यातमा आठ प्रतिशतसम्म नगद अनुदान र बिजुलीको बिलमा छुट सुविधा घोषणा गरेपछि उद्योगीहरु निर्यात गर्न हौसिएका हुन् । अहिले पाल्पा सिमेन्ट, अर्घाखाँची सिमेन्ट, सौर्य सिमेन्ट, बालाजी सिमेन्ट, सिजी सिमेन्ट, सर्वोत्तम सिमेन्ट लगायत निर्यात हुँदै आइरहेका छन् ।