नेपाल जग्गा तथा आवास विकास संघले विज्ञप्तीमार्फत कित्ताकाट पूर्ण रुपमा खुला गर्ने सरकारी निर्णयको स्वागत गरेको छ ।
काठमाडौं । सरकारले लामो समयदेखि रोकिएको कित्ताकाट खोल्ने निर्णय गरेपछि घरजग्गा व्यवसायीहरु उत्साहित बनेका छन् । मंगलबार बसेको मन्त्रिपरिषद् वैठकले भूउपयोग नियमाली २०७९ मा पहिलो संसोधन गरी कित्ताकाट पूर्ण रुपमा खुला गरेको छ ।
नेपाल जग्गा तथा आवास विकास संघले विज्ञप्तीमार्फत कित्ताकाट पूर्ण रुपमा खुला गर्ने सरकारी निर्णयको स्वागत गरेको छ । विज्ञप्तीमा भनिएको छ– ‘देशको समग्र आर्थिक गतिविधि सुस्त बन्दै गएको वर्तमान परिप्रेक्ष्यमा कित्ताकाट खुलेबाट घरजग्गा क्षेत्रको कारोबार सहज भई देशको अर्थतन्त्र पनि चलायमान बन्ने अपेक्षा छ ।’
भू–उपयोग नियमावली, २०७९ मा भएको पहिलो संशोधनबाट नेपालको रियल इस्टेट व्यवसायीका साथै सर्वसाधारण जनता समेतले सहजरुपमा कित्ताकाट गर्न पाउने संघको ठहर छ । साथै, यसबाट घरजग्गाको खरिद बिक्रीमा पारदर्शीता कायम गर्नमा समेत सहयोग पुग्ने अपेक्षा संघको छ ।
संघले सरकारसँग भूमि सम्बन्धी एकीकृत ऐन र शहरी विकास ऐन समेत जारी गर्न आग्रह गरेको छ ।
विज्ञप्तीमा भनिएको छ– ‘घरजग्गा व्यवसायलाई मर्यादित, व्यवसायिक, स्वच्छ एवं पारदर्शी बनाउँदै जग्गा तथा आवास विकास मार्फत देशको अर्थतन्त्रलाई योगदान पुर्याउने लक्ष्यका साथ २०५० सालमा स्थापित यो संघ व्यवस्थित शहरीकरण र जग्गा तथा आवास विकास लगायतका विषयहरुमा सबै सरकारी निकायहरुसँग सहयोग, समन्वय एवं सहकार्य कायम राख्दै
मुलकको अर्थतन्त्रलाई सबल बनाउन सदा तत्पर रहेको छ ।’