एएसी ब्रिक्स उद्योग नौ पुगे, पाँच अर्ब लगानी

काठमाडौं । आधुनिक निर्माण सामाग्री एएसी ब्रिक्स (रातो इँटको विकल्प) को प्रयोग बढ्न थालेसँगै उद्योगहरु पनि थपिँदै गइरहेका छन् । 

एक दशकको अवधिमा एएसी उद्योगको संख्या नौ पुगेको एएसी ब्रिक उत्पादक संघले जनाएको छ । यी उद्योगमा करिव पाँच अर्ब लगानी रहेको र प्रत्यक्ष/अप्रत्यक्ष पाँच हजारले रोजगारी पाइरहेको संघका अध्यक्ष निकोलस पाण्डेले बताए ।

स्वदेशी कच्चा पदार्थ सिमेन्ट र वालुवाको प्रयोग गरेर स्वदेशमै उत्पादन गरिने एएसी ब्रिक पराम्परागत रातो इँटाको विकल्पका रुपमा प्रयोग हुँदै आइरहेको छ । खासगरि ठूला भवनहरुमा एएसी ब्लक निर्विकल्प बन्‍न थालेको छ । 

एएसी ब्लक उद्योगको कुल उत्पादन क्षमता २२ सय घनमिटर प्रतिदिन रहेको छ । एएसी ब्लक जर्मन प्रविधिमा आधारित हलुका, अग्नी, ध्वनी र ओस प्रतिरोधक, वातावरणमैत्री र विश्वसिनय निर्माण सामाग्री भएको संघको दाबी छ ।

ठूला होटेलहरु नक्सालको म्यारियट र अनामनगरको बसेरा बुटिक होटेलमा एएसी प्रयोग गरिएको छ । निर्माणाधिन सर्वोच्च अदालतको भवनमा पनि एएसी ब्लक प्रयोग भइरहेको छ । 

एएसी ब्लक छोटो अवधिमै नेपालका महत्वपूर्ण आयोजना, भवन लगायतमा प्रयोग भइसकेको छ । नेपाल गुणस्तर तथा नापतौल विभागले पनि एएसी ब्लकलाई निर्माण सामाग्रीको रुपमा अंगिकृत गरी आवश्यक सुचक नेपाल गुणस्तर समेत निर्धारण गरिसकेको छ ।

केही उद्योगहरुले गुणस्तर प्रमाणपत्र समेत पाइसकेका छन् भने बाँकी उद्योगहरुले गुणस्तर प्रमाणपत्र लिने प्रकृयामा रहेको संघले जानकारी गराएको छ । एएसी ब्लकमा सिमेन्ट, बालुवा, जिप्सम, आल्मुनियम लगायत कच्चा पदार्थ प्रयोग गरिन्छ । 

एएसी ब्लकको फ्याक्ट्री प्राइस प्रतिघनमिटर नौ हजार रुपैयाँ रहेको बताइएको छ । यो रातो इँटाभन्दा करिव ३० प्रतिशत सस्तो पर्ने संघले जनाएको छ ।

यो इँटा ठूलो आकारको हुने भएकोले छिटो वाल लगाउन सकिने र सिमेन्टको मसला कम प्रयोग हुन्छ । जसले निर्माण लागत घटाउन मद्दत गर्नेछ । यस्तै, अत्यन्त हलुका र बलियो हुने भएकोले भूकम्प प्रतिरोधी रहेको दाबी छ ।