लक्ष्मी स्टिल र सर्वोत्तम सिमेन्टले तिर्न थाले विद्यूत महशुल बक्यौता

काठमाडौं । लक्ष्मी स्टिल र सर्वोत्तम सिमेन्टले डेडिकेटेड तथा ट्रंकलाइनबाट विद्युत् खपत गरेबापतको बक्यौता महसुल भुक्तानी सुरु गरेका छन् । 

विष्णु न्यौपाने नेतृत्वको व्यवसायिक घराना सौरभ समूहले नवलपरासीको सुनवलमा सञ्चालित दुबै उद्योगको विद्युत महशुल बक्यौता भुक्तानी गर्न थालेको हो । 

सर्वोत्तम सिमेन्ट उद्योगले बक्यौताबापतमो दोस्रो किस्ता भुक्तानी गरिसकेको छ भने लक्ष्मी स्टिलले शुक्रबार पहिलो किस्ता बुझाएको छ । दुबै उद्योगको बक्यौता २८ किस्तामा तिर्ने समूहले प्रतिबद्धता जनाएको छ ।

लक्ष्मी स्टिलको २३  करोड ७९ लाख रुपैयाँ बक्यौता रहेको नेपाल विद्युत् प्राधिकरणले जनाएको छ, जसमध्ये शुक्रबार पहिलो किस्ताबापत ८४ लाख ९८ हजार रुपैयाँ बुझाएको छ । 

सर्वोत्तम सिमेन्ट उद्योगको ११ करोड ९६ लाख रुपैयाँ बक्यौता छ, जसमध्ये शुक्रबार नै दोस्रो किस्ताबापत ३७ लाख ६३ हजार रुपैयाँ बुझाएको बताइएको छ ।