कलंकी र कुलेश्वर क्षेत्रमा फेरी बढ्यो अपार्टमेन्ट किनबेच

काठमाडौं । फागुन महिनामा घरजग्गा किनबेच बढ्न नसकेपनि बहुतले आवास अपार्टमेन्ट किनबेच भने बढेको छ ।

फागुन महिनामा ५३ युनिट अपार्टमेन्ट किनबेच भएका छन् । माघमा स्वात्तै घटेको अपार्टमेन्ट खरिद बिक्री फागुनमा पुनः बढेको हो । माघमा २९ युनिट मात्रै अपार्टमेन्ट किनबेच भएको भूमि व्यवस्थापन तथा अभिलेख विभागको तथ्यांक छ ।

कलंकी, कुलेश्वर लगायत क्षेत्रमा अपार्टमेन्ट किनबेच बढेपछि समग्र कारोबार उत्साहप्रद देखिएको हो । फागुनमा कुल ५३ युनिटमध्ये २४ युनिट अपार्टमेन्ट कलंकी मालपोत कार्यालयबाट मात्रै किनबेच भएको विभागले जनाएको छ ।

अशोज महिनायता कलंकीस्थित मालपोतबाट अपार्टमेन्ट किनबेच उच्च भइरहेको देखिन्छ । 

कलंकी क्षेत्रमा सोल्टी सिटी, कुलेश्वर अपार्टमेन्ट, ओरेन्टिय कोलोनी, मेट्रो अपार्टमेन्ट, डाँफे अपार्टमेन्टलगायत रहेका छन् । तुलनात्मक रुपमा अपार्टमेन्ट परियोजना कम भएपनि कलंकी मालपोतले हेर्ने क्षेत्रमा सबैभन्दा धेरै किनबेच भएका छन् ।

ललितपुरमा १३ युनिट अपार्टमेन्ट किनबेच भएको देखिन्छ । सबैभन्दा धेरै अपार्टमेन्ट पनि ललितपुर क्षेत्रमै निर्माण भएका छन् । काठमाडौंको डिल्लीबजार मालपोतबाट ८ युनिट किनबेच हुँदा पोखराबाट चार युनिट अपार्टमेन्ट किनबेच भएको देखिन्छ ।

यस्तै, चावहिल क्षेत्रमा तीन र पर्साको वीरगञ्जमा एउटा अपार्टमेन्ट किनबेच भएको छ ।

नेपालमा काठमाडौं, ललितपुर, पोखरा, रुपन्देही, बीरगञ्ज, झापा, मोरङलगायत क्षेत्रमा अपार्टमेन्ट निर्माण भइरहेका छन् । कारोबारका हिसावले उपत्यकापछि पोखरा र वीरगञ्जमा धेरै अपार्टमेन्ट किनबेच हुने गरेका छन् ।

काठमाडौं र ललितपुरपछि सबैभन्दा धेरै अपार्टमेन्ट पोखरामा निर्माण भइरहेको देखिन्छ । पोखरामा निर्माण सम्पन्न भएका र निर्माणाधिन अपार्टमेन्टको संख्या एक दर्जनभन्दा बढी छ ।