भूकम्पले चर्किएको मालपोत भवनबाट एक अर्ब राजस्व उठाउँछन् कर्मचारी

काठमाडौं। ०७२ को भूकम्पमा रातो स्टिकर टाँसिएको मालपोत कार्यालय भरतपुरको भवन हालसम्म पुनः निर्माण हुन सकेको छैन। उक्त जोखिमपूर्ण भवनमा बसेर कर्मचारीले वार्षिक १ अर्ब हाराहारीमा राजस्व उठाउँदै आएका छन्।

बाइपास सडकसँगै ६ कठ्ठा जमिनमा रहेको जीर्ण भवनमा टिनमुनी अभिलेख राखिएका छन्। कार्यालयका प्रमुख रमेशप्रसाद गौतमका अनुसार भूकम्पपछि ठाउँठाउँमा चर्किएकाले भवन प्रयोग गर्दा उच्च जोखिम हुने भन्दै रातो स्टिकर टाँसिएको छ। 

०५२ मा निर्माण गरिएको यो भवनमा ठाउँठाउँमा टिनले छाएर कार्यालयको काम गरिँदै आइएको छ। कार्यालयको नजिकै १७ कठ्ठा जग्गासमेत छ। सोही जग्गामा नयाँ भवन बनाएर पार्किङसहितको कार्यालय बनाउन पटकपटक भूमि व्यवस्था तथा अभिलेख विभागमा पत्र पठाइएको प्रमुख गौतमले बताए। उनले भने, ‘हामीले विभागमा लेखेर पठाएका छौँ। तर हालसम्म नयाँ भवन बन्न सकेको छैन।’

कार्यालयमा ४२ जना कर्मचारी छन्। यहाँबाट चालु आर्थिक वर्षको फागुन मसान्तसम्म ८७ करोड ८० लाख राजस्व संकलन भइसकेको प्रमुख गौतमले जानकारी दिए। उनका अनुसार यस अवधिमा २१ हजार पाँच सय एक जनाले सेवा लिइसकेका छन्।

भरतपुर महानगर १९ वटा वडासँगै रत्ननगर र कालिका नगरपालिका एवं इच्छाकामना गाउँपालिकाका नागरिकलाई यहाँबाट सेवा दिने गरिएको छ। गौतमका अनुसार एक वर्षमा एक अर्बभन्दा बढी राजस्व संकलन हुन्छ। संकलित राजस्वमध्ये पुँजीकर लाभकरबाहेक ६० प्रतिशत स्थानीय तह र ४० प्रतिशत प्रदेशमा जाने गर्दछ।