एक वर्षमा तीन अर्ब ८५ करोडको सिमेन्ट निर्यात

काठमाडौं । बितेको आर्थिक वर्षमा सिमेन्ट तथा क्लिंकर निर्यात उत्साहप्रद देखिएको छ । एक वर्षमा तीन अर्ब ८५ करोड २८ लाख रुपैयाँ बराबरको २८ लाख ३९ हजार टन सिमेन्ट तथा क्लिंकर (अर्धप्रशोधित सिमेन्ट) भारतीय बजारमा निर्यात भएको छ ।

यो निर्यात अघिल्लो आव ०७९/८० को तुलनामा तीन अर्ब ७ करोड ३५ लाख रुपैयाँले धेरै हो । अघिल्लो आवमा ७७ करोड ९३ करोड २९ लाख रुपैयाँको १० लाख चार हजार टनमात्र सिमेन्ट र क्लिंकर निर्यात भएको भन्सार विभागको तथ्यांक छ । 

नेपालमा उत्पादिन सिमेन्ट तथा क्लिंकर ०७९ असारदेखि सिमेन्ट निर्यात सुरु भएको थियो । निर्यात सुरु भएको दुई वर्षमै सिमेन्टको निर्यातले उत्साह ल्याएको व्यवसायीको भनाई छ ।

गत वर्ष एक अर्ब ८८ करोड २० लाख रुपैयाँ बराबरको पाँच लाख ६ हजार ८४१ टन क्लिंकर र एक अर्ब ९७ करोड आठ लाख रुपैयाँ बराबरको २३ लाख ३२ हजार ३७६ टन तयार सिमेन्ट निर्यात भएको विभागले जनाएको छ । 

मूल्यका हिसावले तयारी सिमेन्ट र अर्धप्रशोधित सिमेन्ट (क्लिंकर)को निर्यात करिव बराबर रहँदै आएको छ । 

अघिल्लो आर्थिक वर्षमा तत्कालिन अर्थमन्त्री जनार्दन शर्माले निर्यातमा ८ प्रतिशतसम्म नगद अनुदान र १५ प्रतिशतसम्म बिद्युत महशुलमा छुट दिने घोषणा गरेसँगै सिमेन्ट निर्यात थालनी सुरु भएको हो ।

अहिले पाल्पा सिमेन्ट, अर्घाखाँची सिमेन्ट, सिजी पाल्पा सिमेन्ट, बालाजी सिमेन्ट, सौर्य सिमेन्ट, सर्वोत्तम सिमेन्ट लगायतले भारतीय बजारमा आफ्नो उत्पादन निर्यात गर्दै आइरहेका छन् ।