मंसिरका लागि पनि ११ बैंकले घटाए मुद्दति निक्षेपको ब्याजदर

काठमाडौं । कर्जाको माग बढ्न नसकेपछि मुद्दति निक्षेपको ब्याजदर निरन्तर घटिरहेको छ। 

कात्तिक महिनामा वाणिज्य बैंकहरुको मुद्दति निक्षेपको औसत ब्याजदर ६.१८ प्रतिशत रहेकोमा मंसिरमा घटेर ५.९६ प्रतिशत भएको छ । एक महिनामा व्यक्तिगत मुद्दतीको औसत ब्याजदर ०.२२ प्रतिशत विन्दुले घटेको हो । 

मंसिरका लागि ११ वाणिज्य बैंकले ब्याजदर घटाएका छन् भने ८ बैंकले व्यक्तिगत मुद्दतीको अधिकतम ब्याजदर स्थिर राखेका छन्  । मंसिरमा पनि धेरै वाणिज्य बैंकहरुले  निक्षेपको ब्याजदर घटाएका हुन् । 

देशमा आर्थिक गतिविधि नबढ्दा कर्जाको माग पनि बढ्न नसकेको हो । चरम निरासा बढिरहेका हुँदा लगानीकर्ताले बैंकबाट कर्जा लिएर लगानी गर्ने हिम्मत गर्न सकेका छन् । 

कर्जा प्रवाह बढ्दै जानुपर्नेमा उल्टै खुम्चिरहेको नेपाल राष्ट्र बैंकको तथ्यांकले देखाउँछ । असोजमा ४६ खर्ब ८२ अर्ब रुपैयाँ कर्जा लगानी भएकोमा कात्तिक मसान्तसम्म आइपुग्दा १३ अर्बले घटेर ४६ खर्ब ६९ अर्बमा खुम्चिएको छ ।

कृषि विकास, लक्ष्मी सनराइज, ग्लोबल आईएमई, कुमारी, प्राइम, सिटिजन्स, नबिल, स्टान्डर्ड चार्टर्ड, माछापुच्छ्रे, एनएमबी र एनआईसी एसिया बैंकले मुद्दति निक्षेपको ब्याजदर घटाएका छन् । नेपाल एसबीआई, नेपाल, सानिमा, इन्भेस्टमेन्ट मेगा, सिद्धार्थ, प्रभु, हिमालयन र एभरेस्टले ब्याजदर स्थिर राखेका छन्

पछिल्लो एक वर्षयता बैंकको बैंकमा निक्षेपको ब्याजदर निरन्तर ओरालो लागिरहेको छ । अर्थतन्त्र शिथिल भएर तंग्रिन नसक्दा कर्जाको माग पनि बढ्न सकेको छैन ।

बैंकमा तरलता थुप्रिएपछि कर्जाको ब्याजदर पनि घटेको छ । अहिले न्यूनतम ७ प्रतिशत ब्याजदरसम्ममै कर्जा पाउन थालेको छ । तैपनि कर्जाको काग नबढेको बैंकरको गुनासो छ ।

उद्योग र व्यापार मात्र होइन, घरजग्गा र शेयर कारोबारमा समेत उल्लेख्य कर्जा बढ्न सकेको छैन । यही अवस्था रहिरहे अझै निक्षेप र कर्जाको ब्याजदर नबढ्ने पक्कापक्की छ ।