ब्याजदर घट्दा पनि बढेन घरजग्गा कारोबार, असोजमा साढे ३० हजार लिखत पारित

काठमाडौं । असोज महिनामा घरजग्गा किनबेच झन घटेको छ । अघिल्लो असोजमा ३९ हजार ८८१ लिखत पारित भएकोमा यो वर्षको असोजमा ३० हजार ५२७ मात्रै पारित भएका छन् ।

असोजमा घरजग्गा किनबेच घटेसँगै राजस्व समेत घटेको भूमि व्यवस्थापन तथा अभिलेख विभागको तथ्यांक छ।

अघिल्लो असोजमा ४अर्ब ८ करोड ६६ लाख रुपैयाँ राजस्व संकलन भएकोमा यो असोजमा ३ अर्ब ८ करोड १२ लाख मात्रै संकलन भएको छ ।

बैंकमा तरलता फालाफाल हुनुका साथै कर्जाको ब्याजदर सिंगल डिजिटमा झर्दा पनि घरजग्गा किनबेचमा सुधार आउन सकेन । सरकार र राष्ट्र बैंकले घरजग्गा कारोबार चलायमान बनाउन भन्दै नीतिगत सहजीकरण समेत गरेका छन् । भूउपयोग नियमावली-२०७९ संशोधन गरेर जग्गा कित्ताकाटमा समेत सहजीकरण गरिएको छ ।

असोजमा दशैं बिदाले कारोबार दिन कम हुँदा पनि कारोबार अघिल्ला महिनाहरुको तुलनामा कम हुने गर्छ ।

असोजमा पनि कारोबारमा सुनसरी इनरुवा मालपोतबाट १ हजार १८५ लिखत पारित भएर पहिलो बनेको छ । यस्तै, धनुषा मालपोतमा १ हजार १०७, मोरङको बेलबारी मालपोतमा १ हजार १६, सप्तरीको राजविराज मालपोतमा ९ सय ९, झापाको भद्रपुर मालपोतमा ८ सय ६३, भक्तपुरको मालपोतमा ८ सय २१, कपिलवस्तुको तौलिहवा मालपोतमा ७ सय १८ लिखत पारित भएको छ ।

राजस्व संकलनमा भने काठमाडौं उपत्यकाका मालपोत कार्यालय अग्रस्थानमा छन् । असोजमा डिल्लिबजार मालपोतबाट सबैभन्दा धेरै ३० करोड ६६ लाख रुपैयाँ राजश्व उठेको विभागको तथ्यांक छ ।

यस्तै, लगनखेल मालपोतबाट ३० करोड २६ लाख, भक्तपुर मालपोतबाट २५ करोड ३९ लाख, चाबहिल मालपोतबाट २३ करोड ६८ लाख र कलंकी मालपोतबाट २० करोड ४८ लाख रुपैयाँ राजस्व संकलन भएको छ ।