सिमेन्ट निर्यातले जगाउँदै आशा, ६ महिनामा पौने दुई अर्बको निर्यात

काठमाडौं । आधुनिक निर्माणमा अत्यावश्यक मानिने निर्माण सामाग्री सिमेन्ट र क्लिंकरको बढ्दो निर्यातले आशा जगाएको छ । 

चालु आर्थिक वर्षको साउनदेखि पुससम्म ६ महिनामा एक अर्ब ७६ करोड ३३ लाख रुपैयाँभन्दा बढीको सिमेन्ट तथा क्लिंकर भारत निर्यात भएको छ । गत आर्थिक वर्षभरीमा ७८ करोडको मात्रै सिमेन्ट निर्यात भएको थियो । 

यो वर्ष सिमेन्ट र क्लिंकर निर्यात पाँच अर्ब नाघ्‍ने उद्योगीहरुको अनुमान छ । 

नेपाल विद्यूत प्राधिकरणले डेडिकेटेड र ट्रंक लाइनको बक्यौता नतिरेको बताउँदै सिमेन्ट उद्योगहरुमा बिजुलीको लाइन काट्दा समेत सिमेन्ट निर्यातमा कुनै असर देखिएको छैन् । उद्योगीहरुले भित्रभित्रै जेनेरेटर चलाएरै भएपनि सिमेन्ट उत्पादन गरी निर्यातलाई निरन्तरता दिएको बताइन्छ । 

नेपालबाट पहिलो पटक २३ असार ०७९ मा सिमावर्ती भारतीय बजारमा सिमेन्ट निर्यात गरिएको थियो । सुरुमा पाल्पा सिमेन्टले तानसेन ब्रान्डको सिमेन्ट भारतीय बजारमा पठाएको थियो । त्यसयता अर्घाखाँची, सर्वोत्तम, बालाजी, सिजी पाल्पालगायत सिमेन्ट उद्योगले पनि निर्यात सुरु गरिसकेका छन् । 

६ महिनाको अवधिमा ८७ करोड २० लाख ९७ हजार रुपैयाँ बराबरको दुई लाख २२ हजार ११७ टन अर्धप्रशोधित सिमेन्ट (क्लिंकर) निर्यात भएको छ । यसै अवधिमा ८९ करोड १२ लाख १३ हजार रुपैयाँ बराबरको १५ लाख ५० हजार २५० टन तयारी सिमेन्ट निर्यात भएको छ । 

मूल्यका हिसावले क्लिंकर र सिमेन्ट निर्यात करिव बराबर देखिन्छ । 

पछिल्लो समय निर्यात व्यापारमा सिमेन्टको हिस्सा निरन्तर बढ्दो छ । अरु वस्तुको तुलनामा सिमेन्टको निर्यात वृद्धि पनि उत्साहप्रद देखिन्छ । केही वर्षमै निर्यातमा सिमेन्ट उद्योगको हिस्सेदारी सबैभन्दा धेरै हुने देखिएको छ ।

नेपालमा मन्दीका कारण निर्माण क्षेत्र पुरै सुस्ताएको छ । जसले गर्दा सिमेन्ट, डन्डी, इँटालगायत निर्माण सामाग्रीहरुको माग अत्यन्तै न्यून छ । नेपालमा माग बढ्न नसकेको बेलामा भारतीय बजारमा निर्यात बढ्न थालेपछि सिमेन्ट उद्योगीहरु पनि उत्साहित छन् ।

तत्कालिन अर्थमन्त्री जनार्दन शर्माले आर्थिक वर्ष ०७९.८० को बजेटमार्फत स्वदेशी वस्तु निर्यातमा आठ प्रतिशतसम्म नगद अनुदान र बिजुलीको महशुलमा समेत छुट दिने व्यवस्था गरेपछि उद्योग निर्यात गर्न कस्सिएका हुन् । 

पछिल्लो समय भारतमा निर्माणले तिब्रता पाइरहेको छ । भारत सरकारले हाइवे, रेलमार्ग, मेट्रो रेल, फ्लाइओभर लगायत संरचना निर्माणलाई तिब्रता दिइरहेको छ । निजी क्षेत्रले पनि आवासीयदेखि व्यवसायिक भवन निर्माणलगायतका गतिविधिमा लगानी ओइराइरहेका छन् । 

यही कारण पनि नेपाली सिमेन्टको भारतीय बजार सुनौलो रहेको उद्योगी बताउँछन् ।