गत वर्ष पाँच अर्ब लगानीमा डन्डी तथा बिलेट उत्पादन गर्ने दुईवटा रोलिङ तथा फर्नेस प्लान्ट सञ्चालनमा आएका छन् ।
काठमाडौं । गएको आर्थिक वर्षमा चरम निरासाकै बिच पनि नयाँ ठूला उद्योग सञ्चालनमा आएका छन् ।
वर्षौंदेखि सञ्चालनमा रहेकै उद्योग व्यवसाय संकटमा परिरहेको बेलामा ठूलो लगानीमा स्टिल तथा विलेट उद्योग, सेरामिक्स टायल, अटो एसेम्बली प्लान्टदेखि लक्जरी होटेलसम्म सञ्चालनमा आएका हुन् ।
गत वर्ष पाँच अर्ब लगानीमा डन्डी तथा बिलेट उत्पादन गर्ने दुईवटा रोलिङ तथा फर्नेस प्लान्ट सञ्चालनमा आएका छन् । सुनसरीको दुहबीमा फर्नेस प्लान्टसहितको नयाँ रोलिङ मिल सञ्चालनमा आएको छ भने मोरङको प्रिमियर स्टिलले फर्नेस प्लान्ट थपेको छ ।
राजकुमा गोल्छासहित पाँच ठूला व्यवसायीको संयुक्त लगानीमा पुस ०७९ मा सुनसरी जिल्लाको दुहबीमा नयाँ रोलिङ मिल सञ्चालनमा आएको हो । करिव साढे दुई अर्ब रुपैयाँ लगानी भएको उद्योगबाट उत्पादित बजरंग ब्रान्डको टिएमटी छड बजारमा आएका छन् ।
यो उद्योगमा दैनिक पाँच सय टन डन्डी तथा फलामजन्य सामग्री उत्पादन गर्ने क्षमता छ । उद्योगका लागि आवश्यक एमएस बिलेट पनि उद्योगले आफै उत्पादन गर्न थालेको छ । आफ्नै फर्नेस प्लान्ट राखेर स्पञ्ज आइरन (कच्चा फलाम)बाट गुणस्तरीय बिलेट पनि उत्पादन गरिरहेको उद्योगका सञ्चालकको भनाई छ ।
दुई ठूला व्यवसायीक घराना सारडा ग्रुप र राठी ग्रुपले मोरङमा प्रिमियर स्टिल बिलेट उद्योग सञ्चालनमा ल्याएका छन् । ९ माघ ०७९ देखि उद्योगले व्यवसायिक रुपमा बिलेट उत्पादन सुरु गरेको हो ।
बिलेट उद्योगमा करिव साढे दुई अर्ब रुपैयाँ लगानी भएको बताइएको छ ।
यसअघि टिएमटी डन्डी उत्पादन गर्ने रोलिङ मिलमा डेढ अर्ब लगानी भएको थियो । उद्योगको रोलिङ मिल र फर्नेस प्लान्टमा गरी कुल चार अर्ब लगानी पुगेको छ ।
फर्नेस प्लान्ट करिव १४ महिनामै तयार भएको थियो, जसको दैनिक बिलेट उत्पादन क्षमता पाँच सय मेट्रिक टन छ । यस्तै, उद्योगको दैनिक तीन सय मेट्रिक टन टिएमटी डन्डी उत्पादन क्षमता छ ।
अहिले प्रिमियर स्टिल उद्योगले एमएस बिलेट, टीएमटी छड र स्क्वायर रड उत्पादन गरिरहेको छ ।
सरकारले स्वदेशमै बिलेट उत्पादन गर्ने उद्योगलाई प्रोत्साहन गर्ने नीति लिएपछि बिलेट उत्पादन गर्ने उद्योगको संख्या दर्जन पुगेको छ । सुरुवातमा विरोध गरेका व्यवसायीहरुले पनि पछि बिलेट उद्योग लगाइरहेका छन् ।