दर्तावाल रियल इस्टेट कम्पनीहरुले लिने ऋणको जोखिमभार १०० प्रतिशतमा झारियो

काठमाडौं । सरकारबाट लाइसेन्स लिएका घरजग्गा कम्पनीहरुमा प्रवाह हुने कर्जाको जोखिम भार १०० प्रतिशत कायम गरिएको छ । 

चालु आर्थिक वर्षको मौद्रिक नीतिले आवासीय घर बनाएर बिक्री गर्ने रजिष्‍टर्ड कम्पनीहरुलाई प्रवाह हुने कर्जामा सहजीकरण गरिदिएको हो ।

अहिले दर्तावाल घरजग्गा कम्पनीहरुमा प्रवाह हुने कर्जाको जोखिमभार पनि १५० प्रतिशत कायम थियो । गत आर्थिक वर्षको मौद्रिक नीतिमार्फत राष्‍ट्र बैंकले घरजग्गा क्षेत्रमा प्रवाह हुने कर्जाको जोखिमभार ७५ प्रतिशतबाट बढाएर १५० प्रतिशत पुर्याएको हो ।

राष्‍ट्र बैंकले चालु मौद्रिक नीतिमा दर्तावाला (रजिष्‍टर्ड) रियलस्टेट कम्पनीहरुमा प्रवाह हुने कर्जाको जोखिमभार घटाएको स्पष्‍ट पारेको छ । तर, अन्य घरजग्गा कारोबारमा प्रवाह हुने कर्जाको जोखिमभारबारे स्पष्‍ट बोलेको छैन । मौद्रिक नीतिमा शेयर, घरजग्गा र हायर पर्चेज कर्जाको जोखिमभार पुनरावलोकन गरिने उल्लेख छ । 

राष्‍ट्र बैंकका गभर्नर महाप्रसाद अधिकारीले आवासीय घरहरु बनाएर बिक्री गर्ने दर्तावाला रियल इस्टेट कम्पनीहरुलाई मात्र कर्जाको जोखिमभार घटाएको बताएका छन् ।

सबै खालका घरजग्गा कर्जामा भने यो व्यवस्था लागु नहुने गभर्नर अधिकारीले स्पष्ट पारे।