अपार्टमेन्ट कारोबारको हटस्पट बन्दै कलंकी

काठमाडौं । काठमाडौं उपत्यकाभित्र सबैभन्दा धेरै अपार्टमेन्ट किनबेच ललिपुर मालपोत कार्यालयबाट हुँदै आइरहेको थियो । गगनचुम्बी अपार्टमेन्टहरुको संख्या पनि ललितपुर क्षेत्रमै धेरै छन् ।

तर, पछिल्लो तीन महिनायता कलंकी क्षेत्रमा सबैभन्दा धेरै अपार्टमेन्ट किनबेच भइरहेका छन् । भूमि व्यवस्थापन तथा अभिलेख विभागको तथ्यांकले कलंकी क्षेत्र अपार्टमेन्ट कारोबारको नयाँ हटस्पट बनेको देखाएको छ ।

पछिल्लो महिना पुसमा देशभर कुल ७१ युनिट अपार्टमेन्ट किनबेच भएकोमा कलंकी मालपोतबाट मात्रै ५३ युनिट किनबेच भएका छन् । मंसिरमा किनबेच भएका कुल ६३ युनिट अपार्टमेन्टमध्ये ४३ युनिट कलंकी क्षेत्रमा किनबेच भएको विभागको तथ्यांकले देखाउँछ ।

यस्तै, कार्तिकमा किनबेच भएका कुल २९ युनिट अपार्टमेन्टमध्ये १८ युनिट कलंकी क्षेत्रबाट भएको देखिन्छ । 

भूमि विभागका अनुसार चालु आर्थिक वर्षको पहिलो ६ महिनामा देशभर २२६ युनिट अपार्टमेन्ट किनबेच भएका छन्, जसमध्ये १२५ युनिट अपार्टमेन्ट कलंकी क्षेत्रबाट मात्रै कारोबार भएको देखिन्छ ।

साउन, भदौ र असोज महिनामा भने कलंकी क्षेत्रमा अपार्टमेन्ट किनबेच न्यून देखिन्छ । साउनमा दुई, भदौमा तीन र असोजमा ६ युनिट अपार्टमेन्ट किनबेच भएका छन्, जबकी ती महिनाहरुमा देशभरी क्रमशः १६, २४, २३ युनिट अपार्टमेन्ट किनबेच भएका थिए ।

नेपालमा काठमाडौं, ललितपुर, पोखरा, रुपन्देही, बीरगञ्ज, झापा, मोरङलगायत क्षेत्रमा अपार्टमेन्ट निर्माण भइरहेका छन् । कारोबारका हिसावले उपत्यकापछि पोखरा र वीरगञ्जमा धेरै अपार्टमेन्ट किनबेच हुने गरेका छन् ।

काठमाडौं र ललितपुरपछि सबैभन्दा धेरै अपार्टमेन्ट पोखरामा निर्माण भइरहेको देखिन्छ । पोखरामा निर्माण सम्पन्न भएका र निर्माणाधिन अपार्टमेन्टको संख्या एक दर्जनभन्दा बढी छ ।

कलंकी क्षेत्रमा सोल्टी सिटी, कुलेश्वर अपार्टमेन्ट, ओरेन्टिय कोलोनी, मेट्रो अपार्टमेन्ट, डाँफे अपार्टमेन्टलगायत रहेका छन् । तुलनात्मक रुपमा अपार्टमेन्ट परियोजना कम भएपनि कलंकी मालपोतले हेर्ने क्षेत्रमा सबैभन्दा धेरै किनबेच भएका छन् ।