यस्तो बन्दैछ पुरानो बानेश्‍वरमा १० तलाको गोल्यान टावर, एक अर्ब लगानी

काठमाडौं । कर्पोरेट अफिसहरुलाई भाडामा दिने गरी गोल्यान ग्रुपले पुरानो बानेश्‍वर हाइटमा कर्पोरेट टावर बनाइरहेको छ । 

एक अर्ब रुपैयाँ लगानीमा निर्माण भइरहेको ‘गोल्यान टावर’ को स्ट्रक्चर निर्माणको काम करीव सकिएको छ । अढाई रोपनी क्षेत्रफलमा बनिरहेको १० तलाको भवनमा पार्किङका लागि २ तला बेसमेन्ट हुनेछ । 

गोल्यान ग्रुपले यस टावरलाई आफ्नो फ्ल्यागशिप कमर्शियल बिल्डिङका रुपमा चित्रित गरेको छ । यो भवन सन् २०२२ को जुनसम्म सञ्‍चालनमा ल्याउने लक्ष्य निर्धारण गरिएको छ । 

रियलस्टेटमा लगानी गरिरहेको गोल्यान ग्रुपले काठमाडौंमा अफिस राख्‍ने उपयुक्त ठाउँको अभाव अड्किरहेको बेलामा एउटै भवनमा धेरै अफिसहरु राख्‍न मिल्ने सुविधा सम्पन्‍न भवन निर्माण गरेको हो । 

भवनमा कम्तिमा २० वटा ठूला अफिसहरु राख्‍न मिल्ने ठाउँ तयार हुने ग्रुपका निर्देशक अक्षय गोल्यान बताउँछन् । भवनको माथिल्ला तीन तलामा भने ग्रुपकै विभिन्‍न कम्पनीका अफिसहरु रहनेछन् । अर्थात्, अब गोल्यान ग्रुपको मुख्यालय टावरमा हुनेछ ।

भवनका कुनै पनि फ्ल्याटहरु बिक्री गरिने छैन । सबै फ्ल्याट अफिसहरुका लागि निश्‍चित अवधि तोकेर भाडामा उपलब्ध गराइने बताइएको छ । टावरमा प्रर्याप्त पार्किङ, रेष्टुरेन्ट लगायत सुविधाहरु हुन्छन् ।    

काठमाडौं ठूल्ठूला मल, अपार्टमेन्ट, होटल निर्माण भएपनि अफिस भाडामा दिने गरी बनाइएका भवन त्यति छैनन् । कमलादीको हामा टावर, थापथलीका ट्रेड टावर, थापाथलीकै बिजनेश कम्लेक्स लगायत केही भवनहरुले मात्र फ्ल्याट अफिसका लागि भाडामा दिइरहेका छन् । 

पुरानो बानेश्‍वरबाट एयरपोर्ट, पशुपति, कमलादी, दरबारमार्ग, न्यूरोड लगायत व्यवसायिक क्षेत्रहरु नजिकै पर्ने हुँदा पनि कर्पोरेट अफिसका लागि बानेश्‍वर उपयुक्त ठाउँ हो । 

साँघुरो र महंगो बन्दै गइरहेको काठमाडौंमा अफिस राख्‍नका लागि हाइराइज भवन उपयुक्त हुने गोल्यान बताउँछन् । 

गोल्यान ग्रुपको प्रमुख कर्पोरेट पुरानो बानेश्‍वर सर्नेछ । अहिले ताहाचलको अपार्टमेन्टमा मुख्य कर्पोरेट अफिस छ । ताहाचलको ठाउँले नपुगेको र शहरभन्दा अलि बाहिर पनि भएको हुनाले ग्रुपको कर्पोरेट मुख्यालय नयाँ बानेश्‍वर सार्न लागिएको हो ।

ग्रुपले बालकुमारीमा वेष्‍टार अपार्टमेन्ट बनाइसकेको छ भने टेकुमा करीव डेढ सय युनिटको हाइराइज अपार्टमेन्ट बनाउँदैछ । रियलस्टेट, हस्पिटालिटी, उत्पादन, बैंक तथा वित्तीय संस्था लगायत क्षेत्रमा ग्रुपको लगानी छ । 

अर्को घराना गुण ग्रुपले पनि लाजिम्पाटको मुख्य सडकमै रहेका १० तलाका दुईवटा अपार्टमेन्ट भवनलाई कर्पोरेट टावर बनाउन कस्सिएको छ ।