चैतमा घरजग्गा कारोबार र राजश्व संकलन बढ्यो, देखियो सुधारको शंकेत

काठमाडौं । वर्ष ०८१ को अन्तिम महिना चैतमा देशभर घरजग्गा कारोबारदेखि राजश्व संकलनसम्म बढेको छ ।

चैतमा देशभरका मालपोत कार्यालयबाट ४९ हजार ८३२ घरजग्गाको लिखत पारित भएको छ । यो संख्या चालु आर्थिक वर्षकै सबैभन्दा उच्च हो ।

यस्तै, चैतमा देशभर चार अर्ब ३९ करोड ४७ लाख रुपैयाँ राजश्व संककलन भएको थियो । चैतमा संकलित राजश्व पनि चालु वर्षकै उच्च रहेको भूमि व्यवस्थापन तथा अभिलेख विभागले जनाएको छ ।

 भूमि विभागका अनुसार यसअघि पुसमा ४८ हजार १५६ घरजग्गा कारोबार हुँदा चार अर्ब २५ करोड रुपैयाँ राजश्व संकलन भएको थियो ।

लामो समयदेखि सुस्त रहेको घरजग्गा करोबार वर्षान्तमा सुखद रहेको छ । जसले घरजग्गा व्यवसायीलाई पनि उत्साहित बनाएको छ ।

चैतमा लिखत पारित, रोक्का फुकुवा, नामसारी, जग्गा दर्ता लगायत शिर्षकमा एक लाख ४७ हजार ४१६ सेवा प्रवाह भएको छ ।

उपत्यकामा पनि आर्थिक वर्षकै उच्च कारोबार

काठमाडौं उपत्यकाका तीन जिल्लामा पनि चालु आर्थिक वर्षकै उच्च घरजग्गा किनबेच भएका छन् । उपत्यकाका नौ मालपोत कार्यालयबाट एक महिनतामा चार हजार ४७९ घरजग्गाको लिखत पारित भएको भूमि विभागले जनाएको छ ।

विभागका अनुसार लगनखेलबा ९५१, गोटीखेलबाट १७, भक्तपुरबाट एक हजार ६१, डिल्लीबजारबाट २४७, चावहिलबाट ५४८, कलंकीबाट ७२७, मनमैंजूबाट २६५, साँखुबाट ४८७, टोखाबाट १७६ घरजग्गाको लिखत पारित भएको छ ।

झापा, मोरङ र सुनसरीमा उच्च कारोबार

चैत महिनामा पनि सुनसरीको इनरुवा मालपोतबाट सबैभन्दा धेरै घरजग्गा कारोबार भएका छन् । एक महिनामा इनरुवामा १८ सय ९६ घरजग्गाको लिखत पारित भएको हो ।

झापाको भद्रपुरमा १८ सय चार, मोरङको बेलवारीमा १७ सय १४, धनुषामा १५ सय ३४, सप्तरीको राजविराजमा १४ सय नौ, सर्लाहीको मलंगवामा १२ सय ४७, सिराहामा ११ सय ६१ घरजग्गाको लिखत पारित भए ।

यस्तै, कैलालीको धनगढीमा एक हजार ८५, भक्तपुरमा एक हजार ६१, मोरङको विराटनगरमा एक हजार २३ घरजग्गाको लिखत पारित भएका छन् ।