भक्तपुर इँटा उद्योग व्यवसायी संघको अध्यक्षमा ह्योम्वा

भक्तपुर । भक्तपुर इँटा उद्योग व्यवसायी संघको अध्यक्षमा पुनः नातिभाइ ह्योम्वा निर्वाचित भएका छन् । संघको २९औं वार्षिक साधारणसभाले ह्योम्वाको नेतृत्वमा १० सदस्यीय नयाँं कार्यसमिति निर्वाचित गरेको हो ।

संघको उपाध्यक्षमा आशाकाजी त्वानाबासु, सचिवमा आसाराम बैद्य, कोषाध्यक्षमा लक्ष्मीप्रसाद त्वानाबासु र सहसचिवमा रत्नलाल साँढ निर्वाचित भएका छन् । यस्तै, सदस्यहरुमा विष्णुसुन्दर प्रजापति, बालगोविन्द तचामो, केशव कवां, पूर्णप्रसाद गाइजू र राजेश त्वानाबासु निर्वाचित भएका छन् ।

अधिवेशनमा बोल्दै नेपाल मजदुर किसान पार्टीका केन्द्रिय सचिव एवं संघीय सांसद् प्रेम सुवालले संसदलाई छलेर विधेयक ल्याउनु प्रजातन्त्रविपरित भएको टिप्पणी गरे । संसद नरहेको अवस्थामा सहकारी ठगीविरुद्धको विधेयक ल्याउनु प्रजातन्त्रविरुद्ध रहेको उनको भनाई थियो ।

सुवालले कानुन चाहिएको भए छिटै संसद बैठक बालाउन सकिने बताए । तर आफूलाई प्रजातन्त्रबादी भन्ने पार्टीेले त्यसो नगरी  प्रजातान्त्रिक व्यवहार नदेखाएको उनले बताए । उनले नाम एउटा र काम अर्काे गर्ने पार्टीहरुलाई निर्वाचनमा जनताले देखाइदिनुपर्ने बताए ।

कार्यक्रममा जिल्लाको चाँंगुनारायण नगरपालिकाका प्रमुख जीवन खत्रीले इटाभटाको विषयमा चाहिने भन्दा वढी नकारात्मक टिकाटिप्पणी हुने गरेको बताए ।

संघका कार्यबाहक अध्यक्ष कृष्णप्रसाद अवाल, भक्तपुरका प्रमुख जिल्ला अधिकारी गोपालप्रसाद अर्याल, भक्तपुर उद्योग वाणिज्य संघका अध्यक्ष रोशनीमैयाँ धौबञ्जा, भक्तपुर ट्रक व्यवसायी संघका अध्यक्ष लक्ष्मीप्रसाद गोरालगायतले इँटा उद्योग देशकै उद्योग भएकाले यसको प्रवद्धर्नमा सरकार लाग्नुपर्नेमा जोड दिए ।