भदौको तुलनामा असोजमा बढ्यो कित्ताकाट

काठमाडौं । भदौको तुलनामा असोजमा कित्ताकाट सामान्य बढेको छ । भदौमा देशभर ६१ हजार ३३२ कित्ताकाट भएकोमा असोजमा ७२ हजार ९५८ कित्ताकाट भएका छन् ।

असोजमा घरजग्गा कारोबार र राजश्व संकलन घटेपनि कित्ताकाट करिव साढे ११ हजारले बढेका छन् । 

अघिल्लो महिना भदौको तुलनामा कित्ताकाट बढे पनि गत वर्षको सोही महिनाको तुलनामा भने निकै कम हो । गत असोजमा एक लाख ६ हजार ३६९ कित्ताकाट भएको भूमि व्यवस्थापन तथा अभिलेख विभागले जनाएको छ ।

०७९ असोजमा भने अत्यन्तै कम १९ हजा १७८ कित्ताकाट भएको विभागको तथ्यांक छ । त्यतिबेला भर्खर भूमि व्यवस्थापन ऐन २०७९ जारी भएको र देशैभर कित्ताकाट ठप्प भएको समय थियो ।

भदौको तुलनामा असोजमा कित्ताकाट बढ्नुको कारण पनि कित्ताकाट खुला गरिनु हो । सरकारले भूउपयोग नियमावली दोस्रो पटक संसोधन गरेर कित्ताकाट खुला गरेको थियो । तर, भदौमा भने भूउपयोग नियमावली संशोधन नगरिएको हुँदा कित्ताकाट ठप्प भएको थियो ।

असोजमा उपत्यकामा ८ हजार कित्ताकाट

असोज महिनामा उपत्यकाभित्रका तीन जिल्लामा आठ हजार ८० कित्ताकाट भएका छन् । ललितपुरमा २२ सय ४९, भक्तपुरमा २१ सय ७३ कित्ताकाट हुँदा काठमाडौंका ६ वटा मालपोत कार्यालयबाट तीन हजार ६७८ कित्ताकाट भएको विभागको तथ्यांक छ । 

बेलवारी मालपोतबाट सबैभन्दा धेरै कित्ताकाट

असोजमा मोरङको बेलवारी मालपोत कार्यालयबाट सबैभन्दा धेरै कित्ताकाट भएको विभागले जनाएको छ । बेलवारी मालपोतबाट एक महिनामा २९ सय ३७ कित्ताकाट भएका छन् ।

यस्तै, धनुषाको जनकपुरधामबाट २८ सय २८, सुनसरीको इनरुवा मालपोतबाट २४ सय २८, पर्साबाट २३ सय ४७, ललितपुरको लगनखेलबाट २२ सय २५, भक्तपुरमा २१ सय ७३ कित्ताकाट भएका छन् ।

झापाको भद्रपुरमा १९ सय ६३, कैलालीको धनगढीमा १८ सय ७३, सप्तरीको राजविराजमा १८ सय ६३, रुपन्देहीको बुटवलमा १७ सय ७५, बाँकेमा १७ सय ६१ कित्ताकाट भएको विभागले जनाएको छ ।