मार्बल र ग्रेनाइटका ढिक्कामा भन्सार महशुल घटायो, स्वदेशी उद्योग फस्टाउने

काठमाडौं । सरकारले आयातकार र वर्गाकार रुपमा आउने मार्बल र ग्रेनाइटका ढिक्कामा लाग्दै आएको भन्सार महशुल घटाएको छ । ६ मंसिरमा बसेको मन्त्रिपरिषद बैठकले मार्बल र ग्रेनाइटसँगै सुनचाँदी र दलहनको भन्सार महशुल पनि घटाउने निर्णय गरेको थियो ।

आयातकार र वर्गाकार स्वरुपमा ढिक्का वा पाताका रुपमा आउने मार्बलको भन्सार महशुल ३० प्रतिशतबाट घटाएर १० प्रतिशत बनाइएको छ भने आयातमा लाग्दै आएको १५ प्रतिशत अन्तःशुल्क हटाइएको छ ।

भारत वा इटालीबाट कच्चा पदार्थका रुपमा ल्याइने मार्बलका ढिक्का चारपाटा मिलेका आयातकार र बर्गाकार हुने हुँदा सरकारले तयारी मालकै सरह भन्सार र अन्तःशुल्क लिँदै आएको थियो ।

यस्तै, आयातकार वा वर्गाकार रुपमा ल्याइने ग्रेनाइटका ढिक्का वा पाताको भन्सार पनि महशुल पनि २० बाट १० प्रतिशतमा झारिएको छ । र, यसको आयातमा लाग्दै आएको २५ प्रतिशत अन्तःशुल्क पनि हटाइएको छ ।

सरकारको भन्सार महशुल घटाउने निर्णयसँगै देशभित्र मार्बल र ग्रेनाइट उद्योग फस्टाउने वातावरण बनेको छ । तयारी र कच्चा मालको भन्सार महशुल र अन्तःशुल्क समान भएपछि ठूलो लगानीमा खुलेका डेढ दर्जन हाराहारी मार्बल र ग्रेनाइट उद्योग संकटमा थिए । कतिपय उद्योग बन्द अवस्थामा छन् ।

अब मार्बल र ग्रेनाइटका कच्चा पदार्थ ल्याउँदा भन्सार महशुल कम लाग्ने र अन्तःशुल्क नलाग्ने भएपछि यस्ता उद्योग फस्टाउने छन् ।

अहिले भारतको राजस्थानदेखि इटालीसम्मबाट मार्बल र ग्रेनाइटका ठूला ढिक्काहरु ल्याएर नेपालमा कटिङ गरी मार्बल र ग्रेनाइट बनाउने काम हुन्छ । यस्ता उद्योगमा ठूलो लगानी समेत भएको छ ।