६ महिनामा १९२ अपार्टमेन्ट किनबेच, अशोजमा २३ मात्रै

काठमाडौं । देशभर घरजग्गा कारोबारमा मन्दी कायमै रहँदा अपार्टमेन्ट किनबेच पनि घट्दै गइरहेको छ ।

वैशाखदेखि असोजसम्म ६ महिनाको अवधिमा देशभर १९२ युनिट अपार्टमेन्ट किनबेच भएका छन् । पछिल्लो महिना असोजमा २३ युनिटमात्रै अपार्टमेन्ट किनबेच भएको भूमि व्यवस्थापन तथा अभिलेख  विभागको तथ्यांक छ ।

यस वर्ष असारमा सबैभन्दा धेरै अपार्टमेन्ट किनबेच भएका थिए । असारमा ७१ युनिट अपार्टमेन्ट किनबेच भएकोमा अरु महिना ३० युनिट नाघ्न सकेको छैन ।

वैशाखमा २८ युनिट, जेठमा ३०, असारमा ७१, साउनमा १६, भदौमा २४ र असोजमा २३ युनिट अपार्टमेन्ट किनबेच भएको विभागले जनाएको छ ।

असोजमा ललितपुर मालपोत कार्यालयबाट ७, काठमाडौंको डिल्लीबजारबाट ८, चावहिलबाट २ र कलंकी मालपोतबाट ६ युनिट अपार्टमेन्ट किनबेच भएका छन् । पोखरा, रुपन्देही, वीरगञ्ज, झापा लगायत ठाउँमा असोजमा अपार्टमेन्ट किनबेच शून्य रह्यो ।