माछापुच्छ्रे बैंकले बेसरेटमा ०.५% प्रिमियम ब्याजदरमै घरकर्जा दिने

काठमाडौं । माछापुच्छ्रे बैंकले नजिकिँदै गरेको चाडपर्वलाई लक्षित गरेर एक महिनाको लागि कर्जा सुविधामा छुट दिने भएको छ ।

बैंकले घरकर्जा लिने ग्राहकका लागि आधारदर (बेसरेट)मा ०.५ प्रतिशत प्रिमियम ब्याजदरमा कर्जा उपलब्ध गराउने भएको हो । सोही ग्राहक गाडी कर्जा लिन ईच्छुक भएमा बेस रेटमा ०.५ प्रतिशत नै प्रिमियम व्याजदरमा कर्जा उपलब्ध गराउने बैंकले जनाएको छ ।

बैंकबाट उक्त कर्जा लिने ग्राहकहरुले क्रेडिट कार्ड लिन चाहेमा विशेष छुट समेत प्राप्त गर्न सक्ने छन् । यस्तै, बैंकले एक करोड रुपैयाँसम्मको साना तथा मझौला कर्जाको लागि बेस रेटमा १ प्रतिशत प्रिमियम ब्याजदरमा उपलब्ध गराउने भएको छ । 

साथै, उल्लेखित कर्जाहरुको सेवा शुल्कमा समेत विशेष सहुलियत प्रदान गर्ने बैंकले जनाएको छ । यो अफर भदौ ३१ सम्म लागु हुनेछ ।

हरेक क्षेत्र र वर्गका ग्राहकहरुलाई सरल र सहज बैंकिङ सेवा पुर्याउने उद्देश्यसहित बैंकले देशका सातवटै प्रदेशमा १६५ वटा शाखा, १२ वटा एक्सटेन्सन काउन्टर, १११ शाखारहित बैंकिङ सेवा, २०० वटा एटिएममार्फत १५ लाख भन्दा बढी ग्राहकलाई सेवा प्रदान गर्दै आएको छ ।