आक्रमक फैलिदै भाटभटेनी, तीन दिनको अन्तरमा दुई स्टोर शिलन्यास, तीन अर्ब लगानी हुँदै

काठमाडौं । मन्दीका कारण चल्तिकै सपिङ सेन्टरहरु सुनसान भइरहेका बेलामा भाटभटेनी समूह भने देशैभर सञ्‍जाल विस्तारमा सक्रिय बनेको छ । यसै साता तीन दिनको अन्तर पारेर भाटभटेनीका अध्यक्ष मिनबहादुर गुरुङले पोखरा र चितवनमा दुईवटा स्टोर शिलन्यास गरेका छन् ।

पोखरा र टाँडी दुईवटै पर्यटकीय क्षेत्रमा निर्माण सुरु गरिएका स्टोरमा कुल तीन अर्ब लगानी हुने गुरुङ बताउँछन् । २४ भदौमा निर्माण सुरु गरिएको पोखरा तालचोक स्टोरमा एक अर्ब र २६ भदौमा निर्माण सुरु गरिएको चितवनको टाँडी स्टोरमा करिव दुई अर्ब लगानी हुनेछ । 

दुईवटै स्टोर सञ्‍चालनमा आएपछि भाटभटेनीका देशभर स्टोर संख्या २९ पुग्नेछन् । भाटभटेनीको ३०औं स्टोर ललितपुरको हात्तिवनमा सञ्‍चालन गर्ने गुरुङको तयारी छ । हात्तिवनमा भाटभटेनी स्टोर निर्माणका लागि जग्गा समेत खरिद गरिसकेको उनले बताए । 

चितवनको रत्ननगर–३ टाँडीमा सञ्‍चालनमा ल्याइने भाटभटेनी स्टोर हालसम्मकै ठूलो हुने बताइएको छ । अहिलेसम्म इटहरीमा सञ्‍चालनमा ल्याइएको भटभटेनी स्टोर सबैन्दा ठूलो हो ।

पोखरा स्टोर सवा दुई लाख  वर्गफिटको हुने  

पोखरा महानगरपालिका–२९ तालचोकमा संचालनमा एक अर्ब लागानीमा निमार्ण हुने स्टोरको क्षेत्रफल दुई लाख २५ हजार वर्गफिटको हुनेछ । 

१२ रोपनी क्षेत्रफलमा बन्‍ने दुई तला बेसमेन्टसहितको सात तले भवनमा दुईवटा मल्टिप्लेक्स सिनेमा हल सञ्‍चालन हुनेछन् । पछिल्लो समय जहाँ भाटभटेनी, त्यहाँ क्यूएफएक्स सिनेमा हल खुलिरहेका छन् । यस्तै, भवनमै फुडकोर्ट, चाइल्ड प्ले जोन पनि रहने बताइएको छ ।

 

पोखराको न्युरोडमा यसअघि नै भाटभटेनीको स्टोर सञ्‍चालनमा छ । यो स्टोर सञ्चालनमा आउँदा पोखरामा भाटभटेनीका दुई स्टोर पुग्‍ने छन् । दिनप्रतिदिन बसाइसराइका कारण ग्राहकहरु बढ्दै गएपछि भटभटेनीले नयाँ स्टोर थप्‍न लागेको हो । 

एक वर्षभित्र सञ्‍चालनमा ल्याइसक्ने लक्ष्य राखिएको २८औं स्टोर (पोखरा)मा करिव पाँच सय जनाले रोजगारी पाउने गुरुङले बताए । 

रत्ननगर स्टोरको क्षेत्रफल सवा तीन लाख वर्गफिट

हल सञ्‍चालनमा रहेका भाटभटेनी स्टोरमा सबैभन्दा ठूलो इटहरी स्टोर हो, जसको क्षेत्रफल दुई लाख ९५ हजार वर्गफिट रहेको छ । अब रत्ननगर टाँडीमा स्टोर सञ्‍चालनमा आएपछि देशकै सबैभन्दा ठूलो स्टोर हुनेछ । रत्ननगर स्टोरको क्षेत्रफल तीन लाख २२ हजार वर्गफिट हुने गुरुङले बताए ।  

चितवनको भरतपुरमा यसअघि नै भाटभटेनी स्टोर सञ्चालनमा छ । टाँडी स्टोर सञ्‍चालनमा आएपछि चितवनमा भाटभटेनीका स्टोर दुई पुग्‍नेछन् । यी दुई स्टोरको दुरी करिव १० किलोमिटर रहने छ ।

चार विघा क्षेत्रफलमा फैलिने एक तला बेसमेन्टसहित सात तले भवन एक वर्षभित्र निर्माण सम्पन्न गर्ने लक्ष्य राखिएको छ । भवनले मात्रै डेढ विघा क्षेत्रफल ओगट्ने बताइएको छ । स्टोरको हरेक तलाको क्षेत्रफल ४६ हजार वर्गफिट हुनेछ, जहाँ पाँच सय हाराहारीले रोजगारी प्राप्त गर्नेछन् । 

भाटभटेनीले पर्यटकीय क्षेत्र टाँडीको स्टोरलाई पर्यटक केन्द्रित बनाउन खोजेको छ । यो स्टोरमा उत्कृष्ट रेस्टुरेन्ट सञ्‍चालन गरिनेछ, जहाँ रैथाने खानादेखि इन्डियन, चाइनिज, इटालियन मल्टिकुजिन सर्व हुनेछ । 

यो स्टोरमा मल्टिप्लेक्स सिनेमा हल, फुडकोर्ट, चाइल्ड प्ले जोन, बैंकलगायत रहने बताइएको छ ।