बैशाख र जेठमा ४० प्रतिशतले बढ्यो कित्ताकाट

काठमाडौं । नयाँ वर्ष ०८१ को पहिलो दुई महिना वैशाख र जेठमा देशभरी कित्ताकाटमा बढोत्तरी आएको छ । यस वर्षको दुई महिनामा अघिल्लो वर्ष ०८० को सोही अवधिको तुलनामा कित्ताकाट ४० प्रतिशतले बढेको हो ।

यो वर्ष दुई महिनामा देशभरी एक लाख ३० हजार ३९४ टुक्रा जग्गा कित्ताकाट भई दुई लाख ९६ हजार ३२ कित्ता पुगेका छन् । गत वर्षको दुई महिनामा ७९ हजार २५३ टुक्रा जग्गा कित्ताकाट भई एक लाख ७९ हजार पुगेका थिए ।

भूमि व्यवस्थापन तथा अभिलेख विभागका अनुसार वैशाख महिनामा एक लाख ३० हजार ६३२ कित्ताकाट भएका छन् भने जेठ महिनामा एक लाख ६५ हजार ४ सय कित्ताकाट भएका छन् । गत वर्षको वैशाखमा ७० हजार ६१७ र जेठमा एक लाख आठ हजार ३०२ कित्ताकाट भएका थिए ।

पछिल्लो समय कित्ताकाटसँगै घरजग्गा किनबेच र राजश्व उठ्ती पनि बढ्दै गइरहेको छ । वैशाख र जेठमा कुल एक लाख १० हजार ९४३ घरजग्गा किनबेच भएको भूमि व्यवस्थापन विभागको तथ्यांक छ । वैशाखमा ४९ हजार ७८२ घरजग्गा किनबेच भएका थिए भने जेठमा ६१ हजार १६१ घरजग्गा किनबेच भएका थिए ।

दुई महिनाको जग्गाको कित्ताकाट र घरजग्गा किनबेच तुलना गर्दा वैशाखको तुलनामा जेठमा दुबै बढेको देखिन्छ । अर्थात्, पछिल्ला महिनामा घरजग्गा किनबेच, कित्ताकाट र राजश्व संकलन बढ्दै गएको सरकारी तथ्यांकले नै देखाउँछ ।

खासगरी, झापा, सुनसरी, मोरङ, जनकपुर, बारा, सिमरा, चितवन, दाङ, बाँके, कैलाली लगायत जिल्लामा घरजग्गा किनबेच र कित्ताकाट उच्च भइरहेको भूमि व्यवस्थापन विभागको तथ्यांकले देखाउँछ ।