सात महिनामा दुई अर्बभन्दा बढीको साढे २१ लाख टन सिमेन्ट र क्लिंकर निर्यात

काठमाडौं । नेपालको खस्कँदो वैदेशिक व्यापारमा निर्माणजन्य सामाग्री सिमेन्टको निर्यातले आशा जगाएको छ । ०७९ असारदेखि सुरु भएको सिमेन्टको निर्यात हरेक महिना बढ्दै गइरहेको छ ।

चालू आर्थिक वर्षको साउनदेखि माघसम्म सात महिनामा दुई अर्ब ६ करोड रुपैयाँको २१ लाख ४७ हजार टनभन्दा बढी सिमेन्ट र क्लिंकरको भारतीय सिमावर्ती बजारमा निर्यात भएको छ ।  

भन्सार विभागका अनुसार, यस अवधिमा ९८ करोड ३८ लाख रुपैयाँको तीन लाख ५९ हजार ७३ टन अर्धप्रशोधित सिमेन्ट (क्लिंकर) निर्यात भएको छ भने एक अर्ब सात करोड ७० लाख रुपैयाँको १७ लाख ८८ हजार ४२६ टन तयारी सिमेन्ट निर्यात भएको छ ।

सरकारले निर्यातमा ८ प्रतिशतसम्म नगद अनुदान र विद्यूत महशुलमा छुट सुविधा दिएपछि उद्योगीहरु सिमेन्ट निर्यातमा कस्सिएका छन् । निर्माण क्षेत्र मन्दिमा फसेका कारण आन्तरिक बजारमा सिमेन्टको माग घटिरहेको बेला भारततर्फको निर्यातले उद्योगलाई ठूलो राहत मिलेको छ ।

भारतीय सिमावर्ती क्षेत्रमा नेपालमा उत्पादित सिमेन्टको माग बढ्दै गइरहेको उद्योगी बताउँछन् । अहिले आधा दर्जन उद्योगले सिमेन्ट र क्लिंकर निर्यात गर्दै आएका छन् । अरु पनि सिमेन्ट निर्यातको तयारीमा जुटिरहेको बताइन्छ ।