बढ्न थाल्यो व्यक्तिगत आवासीय घरकर्जा, चार महिनामा साढे २८ अर्ब कर्जा प्रवाह

काठमाडौं । बैंकले ब्याजदर घटाउन थालेपछि आवासीय व्यक्तिगत घरकर्जा बढ्न थालेको छ । चालु आर्थिक वर्षको साउनदेखि कात्तिकसम्म चार महिनामा बैंक तथा वित्तीय संस्थाहरुले साढे २८ अर्ब व्यक्तिगत घरकर्जा प्रवाह गरेको नेपाल राष्ट्र बैंकले जनाएको छ ।

गत आर्थिक वर्षको यसै अवधिमा करिव आठ करोड रुपैयाँ यस्तो कर्जा प्रवाह भएको थियो । 

राष्ट्र बैंकले चालू मौद्रिक नीतिमार्फत आवासीय व्यक्तिगत घरकर्जा शिर्षकमा अधिकतम दुई करोड रुपैयाँसम्म कर्जा दिन पाउने व्यवस्था गरेको छ । यसअघि यस्तो कर्जा अधिकतम एक करोड ५० लाख रुपैयाँसम्म पाउने व्यवस्था थियो ।

पछिल्लो समय बैंकको ब्याजदर निरन्तर ओरालो लागिरहेको छ । बैंकहरुले एकल बिन्दूको फिक्स ब्याजदरमा घरकर्जा योजना ल्याउन थालिसकेका छन् । साथै, अर्थतन्त्रका अन्य सूचकहरु समेत सुधारतर्फ गएपछि घरजग्गा कारोबारमा फेरी कन्फिडेन्स देखिन थालेको सरकारकै उच्चअधिकारी बताउँछन् । 

हालसम्म बैंक तथा वित्तीय संस्थाहरुले प्रवाह गरेको आवासीय व्यक्तिगत घरकर्जा तीन खर्ब ७६ अर्ब ५८ करोड रुपैयाँ पुगेको देखिन्छ । 

तर, रियल इस्टेट कर्जा भने ऋणात्मक देखिएको छ । चार महिनामा रियल इस्टेट कर्जा चार अर्ब ६८ करोड रुपैयाँ ऋणात्मक छ । कमर्सियल रियल इस्टेटतर्फ प्रवाह हुने नयाँ कर्जाभन्दा पुरानो कर्जा असुली धेरै भएपछि समग्रमा रियल इस्टेट कर्जा ऋणात्मक देखिएको हो ।

रियल इस्टेट शिर्षकमा चार महिनामा रेसिडेन्सियल रियल इस्टेटतर्फ (दुई करोडसम्मको आवासी व्यक्तिगत घरकर्जा बाहेक) ९७ करोड रुपैयाँ कर्जा प्रवाह भएको छ । यस्तै, कमर्सियल कम्पलेक्स तथा रेसिडेन्सियल अपार्टमेन्ट निर्माणमा दुई अर्ब १२ करोड रुपैयाँ कर्जा प्रवाह भएको देखिन्छ ।

तर, आम्दानी सिर्जना गर्ने कमर्सियल कम्पलेक्सतर्फ एक अर्ब ९१ करोड र अन्य रियल इस्टेट शिर्षकतर्फ पाँच अर्ब ८८ करोड रुपैयाँ ऋणात्मक कर्जा देखिएको छ । कमर्सियल प्रयोजनका लागि जग्गा खरिद तथा प्लटिङमा दुई अर्ब १५ करोड रुपैयाँ नयाँ कर्जा थपिएको देखिन्छ ।