देशभर घरको संख्या साढे ७५ लाख नाघ्यो, ६० प्रतिशत घर एक तले

काठमाडौं । देशभर ७५ लाख ५२ हजार ६६ घर पुगेका छन् । केन्द्रीय तथ्यांक विभागले सोमबार सार्वजनिक गरेको राष्ट्रिय जनगणना २०७८ को थप नतिजाले कुल घरमध्ये ५९.८२ प्रतिशत एक तले भएको देखिएको छ । 

दुई तले घर २८.७८ प्रतिशत, तीन तले घर ९.१७ प्रतिशत, चार तले घर १.३ प्रतिशत, पाँचदेखि सात तले घर ०.६४ प्रतिशत, आठदेखि नौ तले घर ०.०१ प्रतिशत र १० तलाभन्दा बढीको ०.००३ प्रतिशत घर रहेको अध्ययनले देखाएको छ ।

मधेश प्रदेशमा एक तला भएको घर सबैभन्दा बढी रहेको गणनामा देखिएको छ । मधेशमा मात्रै ८४.४२ प्रतिशत एक तला घर रहेका छन् । यस्तै, पाँच वा सोभन्दा बढी तला भएको घर बागमती प्रदेशमा सबैभन्दा धेरै अर्थात् २.३४ प्रतिशत रहेको छ ।

देशभर कुल ६६ लाख ६० हजार ८४१ परिवार (संस्थागत परिवार बाहेक) मध्ये १०.२७ प्रतिशत परिवारले आवासीय घर निर्माण गर्दा सरकारी अनुदान लिएको देखिएको छ । जसमध्ये सबैभन्दा धेरै बागमती प्रजेशमा २६.६४ प्रतिशत र सबैभन्दा कम सुदूरपश्चिम प्रदेशमा २.९८ प्रतिशत रहेको छ ।