अब बुढानिलकण्ठमा पनि पाँचतारे होटेल, असोजदेखी 'होलिडे इन' सञ्‍चालनमा आउँदै

काठमाडौं । बुढानीलकण्ठमा निर्माणा भइरहेको पाँचतारे होटेल सञ्‍चालनको अन्तिम तयारीमा छ । करिव ८० प्रतिशत निर्माण कार्य सम्पन्‍न भइसकेको ‘होटेल फरेष्ट इन’ अशोजदेखि सञ्‍चालनमा आउने भएको हो ।

होटेलको व्यवस्थापन अमेरिकी होटेल चेन कम्पनी इन्टरकन्टिनेन्टल होटेल ग्रुप (आइएचजी)को चर्चित ब्रान्ड ‘होलिडे इन’ले गर्नेछ । यो बुढानीलकण्ठ क्षेत्रकै पहिलो पाँचतारे होटेल हुनेछ ।

‘होलिडे इन’ अमेरिकी होटल चेन आइएचजीको मिडस्केल ब्रान्ड हो । होलिडे इनले विश्वभरि ११ सय ९२ होटल सञ्‍चालन गर्दै आएको छ, जहाँ दुई लाख १४ हजार ५९७ कोठा छन् ।

एक लाख ४२ हजार ७ सय ८३ वर्गफिट क्षेत्रफलमा फैलिएको पाँचतारे होटेलमा १०२ कोठा रहनेछन् । होटेलमा करीव तीन अर्ब रुपैयाँ लगानी हुँदैछ, जसमध्ये दुई अर्ब १३ करोड (७२ प्रतिशत) बैंकको ऋण र ८४ करोड (२८ प्रतिशत) रुपैयाँ आफ्नै पुँजी लगानी रहेको छ ।

बुढानीलकण्ठमा पाँचतारे होटेल सञ्‍चालनमा ल्याउन लागेका व्यवसायी हुन्, कांग्रेस सांसद दीपक खड्का । उनले पूर्वको झापामा पनि पाँचतारे होटेल इस्टर्न निर्माण गरिरहेका छन् । 

उनी मन्छियाम हाइड्रोपावर कम्पनीका अध्यक्ष पनि हुन् । बुढानीलकण्ठ र झापाको होटेलमा कुल पाँच अर्ब लगानी हुने बताइएको छ ।

होटलमा फुड एन्ड बेभरेज, क्यासिनो, स्विमिङ पुल, ब्यांक्वेट हल, रेस्टुरेन्ट, कन्फेरेन्स हल, स्पालगायत सुविधा उपलब्ध हुनेछन् । होटेलमा पूर्ण क्षमताको ठूलो क्यासिनो सञ्‍चालनको तयारी भइरहेको छ ।

बुढानीलकण्ठमै थप दुईवटा पाँचतारे पाइपलाइनमा

बुढानिलकण्ठमै अर्को पाँचतारे होटेल बुढानीलकण्ठ हेरिटेज निर्माणको अन्तिम चरणमा छ ।  सिए दीपक पाण्डे, सेयर व्यवसायी अम्बिकाप्रसाद पाण्डे, सिए नवराज बुर्लाकोटीलगायतको संयुक्त लगानी एक अर्ब ६० करोड रुपैयाँमा होटेल सञ्‍चालनमा ल्याउन लागिएको हो ।

करिव १२ रोपनी क्षेत्रफलमा फैलिएको होटेलमा १०२ कोठा हुनेछन् । 

बुढानिलकण्ठमै सूर्य नेपालले ६ अर्ब रुपैयाँ लगानी गरेर पाँचतारे लक्जरी होटेल खोल्ने प्रक्रिया अगाडि बढाइसकेको छ ।