आठ महिनामा ८% थपियो रियल इस्टेट कर्जा, व्यक्तिगत घरकर्जा प्रवाह सुस्त

काठमाडौं । लामो समयदेखि बढ्न नसकेको रियल इस्टेट शिर्षकको कर्जा बढ्न थालेको छ । 

चालु आर्थिक वर्षको पहिलो आठ महिना (साउन–फागुन)मा रियल इस्टेट शिर्षकको कर्जा ८.२ प्रतिशतले बढेको छ । जबकी, गत वर्षको सोही अवधिमा यस्तो वृद्धि –०.५ प्रतिशत ऋणात्मक थियो । 

गत वर्ष रियल इस्टेट शिर्षकमा बैंक तथा वित्तीय संस्थाहरुबाट नयाँ कर्जा प्रवाहभन्दा बढी पुरानो कर्जा असुली भएको देखिन्छ ।

नेपाल राष्ट्र बैंकका अनुसार आठ महिनाको अवधिमा रियल इस्टेट शिर्षकमा २२ अर्ब नौ करोड रुपैयाँ कर्जा थपिएको छ । गत वर्षको सोही अवधिमा एक अर्ब ३० करोड ऋणात्मक थियो ।

रियल इस्टेट कर्जा बढ्न थाल्दा व्यक्तिगत आवासीय शिर्षकको कर्जा प्रवाह भने सुस्त देखिएको छ । गत वर्षको पहिलो ८ महिनामा व्यक्तिगत आवासीय रियल इस्टेट कर्जा १०.४ प्रतिशतले थपिएकोमा यस वर्षको सोही अवधिमा ४.४ प्रतिशतले मात्र वृद्धि देखिन्छ ।

आठ महिनाको अवधिमा व्यक्तिगत आवासीय कर्जा १६ अर्ब ८६ करोड रुपैयाँ थपिएको छ । गत वर्षको सोही अवधिमा यस्तो कर्जा ३६ अर्ब ३५ करोड रुपैयाँले बढेको थियो ।

यस वर्ष व्यक्तिगत आवासीय र रियल इस्टेट कर्जा समग्रमा बढेको देखिन्छ । आठ महिनाको अवधिमा व्यक्तिगत आवासीय र रियल इस्टेट कर्जा कुल ३८ अर्ब ९६ करोड प्रवाह भएको छ । 

गत वर्षको सोही अवधिमा ३५ अर्ब पाँच करोड रुपैयाँ प्रवाह भएको थियो ।

रियल इस्टेट शिर्षकतर्फ रेसिडेन्सियल रियल इस्टेट (२ करोडसम्मको व्यक्तिगत आवासीय कर्जाबाहेक) र जग्गा खरिद तथा प्लटिङ कर्जाको वृद्धिदर ऋणात्मक देखिन्छ । 

कमर्सियल कम्पलेक्स तथा रेसिडेन्सियल अपार्टमेन्ट निर्माण, आम्दानी सिर्जना गर्ने कमर्सियल कम्पलेक्स र अन्य रियल इस्टेट शिर्षकको कर्जामा बढोत्तरी आएको छ ।

अन्य शिर्षकमा मात्रै १७ अर्ब ४७ करोड रुपैयाँ कर्जा थपिएको राष्ट्र बैंकको तथ्यांकले देखाउँछ । ग्राहकले कुनै स्पेशल प्रयोजन नखुलाई लिएको ५० लाखभन्दा माथिको घरजग्गा कर्जा दुई अर्ब २५ करोडले बढेको छ ।