कर्जाको ब्याजदर २८ महिनायताकै कम, ऋण लिएर घरजग्गा किन्‍ने उपयूक्त समय

काठमाडौं । बैंकमा तरलता थुप्रिएपछि ‘कर्जा’ पनि सस्तिन थालेको छ । एक वर्षको अवधिमा कर्जाको ब्याजदर २.३८ प्रतिशत बिन्दूले घटेको हो ।

एक वर्षअघि ०८० जेठमा ‘क’ वर्गका वाणिज्य बैंकहरुको कर्जाको औषत ब्याजदर १२.५३ प्रतिशत कायम रहेकोमा ०८१ जेठ मसान्तसम्म घटेर १०.१५ प्रतिशतमा झरेको राष्ट्र बैंकले जनाएको छ ।

बैंकमा निक्षेपको ब्याजदर निरन्तर घटेपछि कर्जा पनि सस्तिदै गएको हो । फालाफल तरतलता (लगानीयोग्य रकम) थुप्रिन थालेपछि बैंक तथा वित्तीय संस्थाहरुले कम ब्याजदरमा निक्षेप उठाइरहेका छन् । निक्षेपको ब्याजदर घट्ने वित्तिकै बैंकको कस्ट अफ फण्ड घट्ने हुँदा कर्जाको ब्याजदर पनि घट्न जान्छ ।

वाणिज्य बैंकहरुको आधारदर ०८० जेठमा १०.१८ प्रतिशत रहेकोमा ०८१ जेठमा घटेर ८.१७ प्रतिशत कायम भएको छ । निक्षेपको ब्याजदर घटेर बैंकको कष्ट अफ फन्ड कम हुने वित्तिकै आधार दर पनि घट्ने हुन्छ । बैंकको आधार दर घट्ने वित्तिकै कर्जाको ब्याजदर स्वतः घट्ने एक बैंकरले बताए । बैंक तथा वित्तीय संस्थाहरुले आधार दरमा प्रिमियम जोडेर कर्जाको ब्याजदर तोक्ने गर्छन् । 

गत वर्षको फागुनयता निक्षेपको ब्याजदर निरन्तर घटिरहेको राष्ट्र बैंकको तथ्यांकले देखाउँछ । ०८१ जेठ मसान्तसम्म आइपुग्दा वाणिज्य बैंकहरुको निक्षेपको औषत ब्याजदर घटेर ६.१७ प्रतिशतमा झरेको छ । 

विकास बैंक र फाइनान्स कम्पनीहरुको औषत ब्याजदर पनि घटेको छ । ०८० जेठमा विकास बैंकहरुको कर्जाको औषत ब्याजदर १४.४७ प्रतिशत कायम रहेकोमा ०८१ जेठमा आइपुग्दा घटेर ११.६३ प्रतिशत कायम भएको छ ।

फाइनान्स कम्पनीहरुको ब्याजदर पनि एक वर्षमा २.२१ प्रतिशत बिन्दूले घटेर औषतमा १२.८५ प्रतिशत कायम भएको छ । एक वर्षअघि फाइनान्स कम्पनीहरुको औषत ब्याजदर १५.०६ प्रतिशत रहेको थियो ।

विकास बैंक र फाइनान्स कम्पनीहरुले पनि निक्षेप थुप्रिदै गएपछि कर्जाको ब्याजदर घटाउँदै लगेका हुन् । विकास बैंकले पनि एक वर्षमा निक्षेपको औषत व्याजदर ९.४५ प्रतिशतबाट घटाएर ७.०७ प्रतिशतमा झारेका छन् । यस्तै, फाइनान्स कम्पनीको पनि निक्षेपको ब्याजदर १०.१८ प्रतिशतबाट घटेर ८.२८ प्रतिशतमा झरेको छ ।

कर्जाको ब्याजदर घट्दै गएसँगै बैंकबाट ऋण लिएर घरघडेरी खरिद गर्न चाहने ग्राहकहरु लाभान्वित हुन सक्नेछन् । बैंकहरुले एकल बिन्दू (१० प्रतिशतभन्दा कम) ब्याजदरमै घरकर्जा उपलब्ध गराउन थालिसकेको हुँदा ऋण लिएर घरघडेरी खरिद गर्न खोजिरहेका उपभोक्ताका लागि उपयुक्त समय आएको बैंकरहरु बताउँछन् ।