निक्षेपको ब्याजदर अझै घट्यो, १७ वाणिज्य बैंकले घटाए, दुईको यथावत, एनआइसीले बढायो

काठमाडौं । वाणिज्य बैंकहरुले चैतका लागि मुद्दती निक्षेपको ब्याजदर अझै घटाएका छन् । सञ्‍चालनमा रहेका २० मध्ये १७ वाणिज्य बैंकले निक्षेपको ब्याजदर घटाएका हुन् ।

प्रभु बैंक र ग्लोबल आइएमई बैंकले मुद्दती निक्षेपको ब्याजदर यथावत राखेका छन् भने एनआईसी एशिया बैंकले ०.५४ प्रतिशतले ब्याजदर बढाएको छ । 

वाणिज्य बैंकहरुको औषतमा ०.५१ प्रतिशत बिन्दूले निक्षेपको ब्याजदर घटेर ७.२५ प्रतिशत कायम भएको छ । मुद्दती निक्षेपको औषत ब्याजदर फागुनमा ७.७६ प्रतिशत, माघमा ८.१७ प्रतिशत र पुसमा ८.९९ प्रतिशत कायम थियो ।

माथिको तथ्यांकले वाणिज्य बैंकहरुमा निक्षेपको ब्याजदर निरन्तर घटिरहेको देखाउँछ । निक्षेपको ब्याजदर घट्दा बैंकको कष्ट अफ फन्ड घट्न जान्छ, जसले आधार दर (बेस रेट) पनि घटाउँछ। बेस रेट घट्ने वित्तिकै बैंकको कर्जाको ब्याजदर पनि घट्न थाल्छ । निक्षेपको ब्याजदर घट्यो भने कर्जा लिएर काम गर्नेहरुलाई ठूलै राहत मिल्ने देखिन्छ ।

पछिल्लो समय कर्जाको ब्याजदर पनि निरन्तर ओरालो लागिरहेको छ । ०७९ पुसमा वाणिज्य बैंकहरुमा कर्जाको औषत ब्याजदर १३.०३ प्रतिशत रहेकोमा ०८० पुसमा घटेर ११.०८ प्रतिशत कायम भएको छ । 

मुद्दती निक्षेपको ब्याजदर सबैभन्दा धेरै एनएमबि र एभरेष्ट बैंकले १.५ प्रतिशत बिन्दूले घटाएका छन् । नेपाल एसबीआई बैंकले १.०९ प्रतिशत, नेपाल इन्भेष्टमेन्ट मेगा बैंकले १ प्रतिशत, कृषि विकास बैंकको ०.७७ प्रतिशत, हिमालयन र सिटिजन्सको ०.६५ प्रतिशत, कुमारी र नबिलले ०.५ प्रतिशत बिन्दूले ब्याजदर घटाएका छन् ।