देशको पहिलो केबुलकार २६ वर्षमा, लक्जरी रिसोर्ट निर्माण हुँदै

काठमाडौं । देशकै पहिलो मनकामना केबुलकारले २५ वर्ष पूरा गरेको छ । मनकामना दर्शनले आगामी दिनमा अझ स्तरीय सेवा दिने प्रतिबद्धता जाहेर गरेको छ ।

कम्पनीले माता मनकामनाको असीम अनुकम्पा र यात्रुजनको स्‍नेहले मनकामना केबुलकार सेवा यातायातको क्षेत्रमा विशिष्ट इतिहास रच्‍न सफल भएको बताएको छ । केबुलकारले हिन्दुहरुको प्रसिद्ध तीर्थस्थल मनकामना र वरपरको क्षेत्रलाई पर्यटकीय गन्तव्यको रुपमा स्थापित गराउन अतुलनीय योगदान गरेको छ । 

केबुलकार सेवा शुभारम्भसँगै सो क्षेत्र आन्तरिक मात्रै नभएर भारतीय र विश्‍वभरका पर्यटक आकर्षित गर्न सफल गन्तव्यको रुपमा स्थापित भएको छ । ०५४ माघ अन्तिम साता निर्माण सुरु भइ ८ मंसिर ०५५ देखि केबुलकारबाट व्यावसायिक सेवा सुरु गरेको हो । 

देशमा सशस्त्र द्वन्द्व चलिरहेको बेला अनेकौं चुनौतीको सामना गर्दै ठूलो लगानीमा केबुलकार सेवा सञ्‍चालन गरेर कम्पनीले ठूला लगानीकर्ता एवं उद्यमी व्यवसायीमा उत्साह जगाउने काम गरेको थियो । मनकामना केबुलकारको थालनीले नेपालमा लगानीको ठूलो सम्भावना रहेको सन्देश पनि प्रवाह गरेको थियो । 

सुरुका २/४ वर्ष अपेक्षाअनुरुप यात्रु नआए पनि अविचलित सेवालाई निरन्तरता दिएको थियो । मनकामना केबुलकारमा नेपाल बैंकको अगुवाइमा राष्ट्रिय वाणिज्य बैंक र तत्कालीन नेपाल बंगलादेश बैंक ऋण लगानी गरेका थिए ।

सेवा सुरु गरेको ६ वर्षमा ऋण चुक्ता गर्ने लक्ष्य रहेकोमा तत्कालीन विषम परिस्थितिका कारण ऋण चुक्ता गरिसक्न ७ वर्ष लागेको थियो । 

डिजिटल प्रविधिमा स्तरोन्‍नती

२५ वर्षको दौरानमा कम्पनीले केबुलकारको एनालग प्रविधिलाई नयाँ डिजिटल प्रणालीमा स्तरोन्‍नति गरेको कम्पनीका प्रबन्ध निर्देशक राजेशबाबु श्रेष्ठले जानकारी गराए ।

अस्ट्रियाको डोपलमेयर कम्पनीको डी–कनेक्ट भनिने डिजिटल प्रणालीमा स्तरोन्‍नति गर्ने काम सन् २०२१ मै सम्पन्‍न गरिसकेको कम्पनीले बाँकी काम आगामी सन् २०२४ को असोजसम्म सम्पन्‍न गर्ने लक्ष्य लिएको छ । सोको लागि आवश्यक केही उपकरण आयात भइसकेको छ । 

अबको चरणमा नियन्त्रण प्रणाली, सञ्‍चार केबुलका साथै केबुलकारलाई केबुलको लठ्ठा फेरेर पहिलेकै जस्तो नयाँ र स्तरीय प्रविधिको स्वरुपमा सञ्‍चालन हुनेछ । केबुलकार स्तरोन्‍नति गर्न करिब ४५ करोड रुपैयाँ लगानी हुनेछ । 

सुविधा सम्पन्‍न रिसोर्ट बन्दै

सन् २०२५ को सुरुबाटै सञ्‍चालन गर्ने गरी मनकामनामा केबुलकार हाताभित्र सुविधा सम्पन्‍न रिसोर्ट निर्माण भइरहेको छ । ४० कोठाको यो रिसोर्टमा स्विमिङ पुल, हेल्थ क्लब, सभा–सेमिनार हल र रेस्टुरेन्टको सुविधा हुनेछ । 

रिसोर्टस् बाई मनकामना केबुलकार प्रालिको नामबाट सञ्‍चालन हुने उक्त रिसोर्टमा करिब ५५ करोड रुपैयाँ हुने श्रेष्ठले बताए । रिसोर्ट सञ्‍चालनमा आएपछि मनकामना र वरिपरिका क्षेत्रलाई धार्मिक साथै अन्य पर्यटकीय गन्तव्य बनाउने हाम्रो लक्ष्य रहने पनि उनको भनाई छ । 

मनकामना केबुलकारले सुरुआती वर्षमा २–३ लाख यात्रुलाई सेवा दिएकोमा अहिले बढेर वार्षिक ११ लाख यात्रुलाई सेवा दिइरहेको छ । यस वर्ष १२ लाख ५० हजार यात्रुलाई सेवा दिने लक्ष्य छ ।