बाणिज्य बैंकहरुले ०.७५ प्रतिशतभन्दा बढी सेवा शुल्क लिन नपाउने

के तपाईं बैंकबाट ऋण लिँदै हुनुहुन्छ ? यदि हुनुहुन्छ भने तपाईंलाई नेपाल राष्ट्र बैंकले केही राहत दिएको छ । अब ‘क’ बर्गका वाणिज्य बैंकहरुले तपाईंसँग ०.७५ प्रतिशतभन्दा बढी सेवा शुल्क लिन नपाउने भएका छन् ।

राष्ट्र बैंकले ल्याएको चालु आर्थिक वर्षको मौद्रिक नीतिमार्फत बाणिज्य बैंकहरुले कर्जा स्वीकृत गर्दा सेवा शुल्कवापत बढीमा ०.७५ प्रतिशतसम्म मात्र लिन पाउने व्यवस्था गरिदिएको छ । 

यसअघि ‘क’ बर्गकै बैंकहरुले ऋणीसँगै एकदेखि दुई प्रतिशतसम्म आफुखुशी सेवा शुल्क असुल्दै आइरहेका थिए । राष्ट्र बैंकको नयाँ व्यवस्थाले ऋणीलाई थोरै भएपनि राहत पुगेको छ ।

यस्तै, राष्ट्र बैंकले ‘ख’ बर्गका विकास बैंकले १ प्रतिशतभन्दा बढी सेवा शुल्क लिन नपाउने व्यवस्था गरिदिएको छ । यसअघि विकास बैंकले ३ प्रतिशतसम्म सेवा शुल्क लिँदै आइरहेका थिए ।

वित्त कम्पनी १.२५ प्रतिशत र लघुवित्त वित्तीय संस्थाले १.५० प्रतिशतभन्दा बढी सेवा शुल्क लिन नपाउने व्यवस्था भएको छ । ‘ग’ र ‘घ’ बर्गका वित्तीय संस्थाहरुले आफुखुशी चर्को सेवा शुल्क असुल्दै आइहेका थिए । 

बैंक तथा वित्तीय संस्थाहरुले ग्राहकसँग लिने सेवा शुल्कहरुलाई थप व्यवस्थित र पारदर्शी बनाउन अधिकतम सीमा तोकिदिएको राष्ट्र बैंकले जनाएको छ ।