भदौमा ९ महिनायताकै कम घरजग्गा किनबेच, ब्याजदर घटेपनि बढेन कारोबार

काठमाडौं । बैंक तथा वित्तीय संस्थाहरुमा कर्जाको ब्याजदर निरन्तर घटे पनि घरजग्गा किनबेच बढ्न सकेन । भदौ महिनामा पछिल्लो नौ महिनायताकै सबैभन्दा कम घरजग्गा कारोबार भएको छ ।

भदौ महिनामा देशभर साढे ३६ हजार ६ सय घरजग्गाको लिखत पारित भएको छ । यो संख्या ०८० पुसयताकै सबैभन्दा कम भएको भूमि व्यवस्थापन तथा अभिलेख विभागको तथ्यांक छ ।

०८० कार्तिकमा २६ हजार ४६ घरजग्गाको लिखत पारित भएकोमा अर्को महिना मंसिरमा ४१ हजार ८५१ घरजग्गाको लिखत पारित भएका थिए । त्यसयता निरन्तर बढिरहेको घरजग्गा कारोबार ०८१ असारयता निरन्त घटिरहेको छ ।

०६१ जेठमा दुई वर्षयताकै उच्च कारोबार (६१,१६१) भएकोमा असारमा ४६ हजार १७९, साउनमा ४३ हजार ८३५ घरजग्गाको लिखत पारित भएको विभागको तथ्यांक छ । नयाँ सरकार बनेपछि घरजग्गा कारोबार पनि सुधार हुँदै जाने अपेक्षा गरिएकोमा उल्टै घटिरहेको छ । 

नयाँ सरकार बनेपछि शेयर बजारमा भने उछाल नै आयो । तर, घरजग्गा कारोबार तंग्रिन नसकेको तथ्यांकले देखाउँछ ।

पछिल्लो समय बैंकमा पर्याप्त तरलता थुप्रिदा ब्याजदर घट्दै गइरहेको छ । बैंक तथा वित्तीय संस्थाहरुले बोलाएर कर्जा लिन आग्रह गर्न थालेका छन् । एकल बिन्दू ब्याजदरमै घरकर्जाका स्किम बैंकले ल्याइरहेका छन् ।

तर, घरजग्गामा लगानी गर्न सर्वसाधार अझै विश्वस्त हुन नसकेको घरजग्गा कारोबारीको बुझाई छ ।

घरजग्गा कारोबार घटेसँगै राजश्व संकलन पनि घटेको छ । भदौमा देशभरका मालपोत कार्यालयबाट तीन अर्ब ६९ करोड रुपैयाँ राजश्व संकलन भएको छ । यो रकम ०८० चैतयताकै सबैभन्दा कम हो ।