असारमा अपार्टमेन्ट किनबेच २४ महिनायताकै धेरै (चार्टसहित)

काठमाडौं । महिनौंदेखि सुस्ताएको हाइराइज आवास अपार्टमेन्ट किनबेच असार महिनामा बढेको छ । असामा ७१ युनिट अपार्टमेन्ट किनबेच भएको भूमि व्यवस्थापन विभागले जनाएको छ । 

यो संख्या पछिल्लो दुई वर्षयताकै सबैभन्दा उच्च हो । यसअघि ०७९ असारमा ९८ युनिट अपार्टमेन्ट किनबेच भएको थियो । यो बिचमा अपार्टमेन्ट किनबेच संख्या ५० युनिट नाघ्‍न (एक महिनाबाहेक) सकिरहेको थिएन ।

असारमा घरजग्गा किबनेच स्वात्तै घटेको बेलामा अपार्टमेन्ट किनबेच भने उत्साहप्रद वृद्धि भएको तथ्यांकले देखाउँछ ।

वैशाखमा २८ र जेठ महिनामा ३० अपार्टमेन्ट युनिट किनबेच भएक थिए । जबकी, घरजग्गा किनबेच भने वैशाखमा ४९ हजार ७८२ र जेठमा ६१ हजार १७९ युनिट किनबेच भएका थिए । तर, असारमा त्यो संख्या १२ हजारभन्दा बढीले घटेर ४६ हजार १७९ युनिटमा खुम्चिएको छ ।

असारमा सबैभन्दा धेरै अपार्टमेन्टको लिखत पारित डिल्लीबजार मालपोत कार्यालयबाट भएका छन् । एक महिनामै डिल्लीबजार मालपोतबाट २३ युनिट अपार्टमेन्ट किनबेच भएको देखिन्छ ।

ललिपतुरको लगनखेल मालपोत कार्यालयबाट २२ युनिट अपार्टमेन्ट किनबेच हुँदा चावहिल मालपोतबाट ६, कलंकी मालपोतबाट ७ र टोखा मालपोत कार्यालयबाट एउटा अपार्टमेन्ट किनबेच भएको छ ।

असारमा काठमाडौं जिल्लामा मात्रै ३७ अपार्टमेन्ट किनबेच भएका छन् । उपत्यकाकै जिल्ला भएपनि भक्तपुरमा अहिलेसम्म बहुतले अपार्टमेन्ट निर्माण नभएको हुँदा किनबेच नै हुँदैनन् । 

पर्सा जिल्लामा मात्रै नौ युनिट अपार्टमेन्ट किनबेच भएको देखिन्छ । पर्साको वीरगञ्‍जमा चारवटा अपार्टमेन्ट निर्माण भएका छन् । उपत्यकापछि धेरै अपार्टमेन्ट परियोजना निर्माण भइरहेको पर्यटकीय नगरी पोखरामा असारमा तीन युनिट मात्रै किनबेच भएको विभागले जनाएको छ ।