सार्वजनिक खरिद अनुगमन कार्यालयले चित्तबुझ्दो स्पष्टीकरण नदिए निर्माण कम्पनीलाई कालोसूचिमा राख्छ
काठमाडौं । प्रधानमन्त्री कार्यालयअन्तर्गतको सार्वजनिक खरिद अनुगमन कार्यालयले कार्यसम्पादन राम्रो नभएका चिनियाँ र भारतीयसहित २७ कम्पनीसँग सात दिने स्पष्टीकरण मागेको छ ।
सात दिनभित्र चित्तबुझ्दो लिखित स्पष्टीकरण नबुझाए खरिद अनुगमन कार्यालयले निर्माण व्यवसायीलाई कालोसूचीमा राख्नेछ । कालोसूचिमा परेको अवधिभर सार्वजनिक निकायको खरिद तथा निर्माणको टेन्डर प्रकृयामा सहभागी हुन पाइँदैन ।
स्पष्टीकरण सोधिएका विदेशी कम्पनीमा भारतीय दुईवटा रहेका छन् । नेपाल विद्यूत प्राधिकरणको काम गरिरहेको भारत ओडिसाको गुप्ता पावर इन्फ्राष्टक्चर लिमिटेड रहेको छ । जसको मुख्य व्यक्ति अभिषेक गुप्ता हुन् ।
स्पष्टीकरण सोधिएको अर्को भारतीय कम्पनीमा सडक विभागअन्तर्गत गल्छी त्रिशुली मैलुङ स्याफ्रुबेसी रसुवागडी सडक योजनामा नेपाली कम्पनी सिद्धिसाइ प्रकाश कन्स्ट्रक्सन प्रालिसँग जेभीमा काम गरिरहेको भारत कन्स्ट्रक्सन कम्पनी रहेको छ । अनुगमन कार्यालयले भारत कन्स्ट्रक्सन/सिभिसाइ जेभीलाई नै स्पष्टीकरण सोधेको हो ।
भारत कन्स्ट्रक्सनका मुख्य व्यक्ति राजीव गर्ग र सिद्धिसाइका मुख्य व्यक्ति दिपेन्द्र बहादुर शाही हुन् ।
यस्तै, चिनियाँ कम्पनीमा त्रिशुली जलविद्युत कम्पनी लिमिटेडमा कार्यरत चिनियाँ कम्पनी सुइफा एन्हे ग्रुप कम्पनी लिमिटेड रहेका छन् । यो कम्पनीका मुख्य व्यक्ति सि फुगई रहेका छन् ।
अरु सबै नेपाली निर्माण तथा सप्लायर्स कम्पनी हुन् ।