बुढानिलकण्ठमा ३२ करोडसम्मको घर बिक्रीमा

काठमाडौं । एउटै घरको मूल्य ३२ करोड रुपैयाँ ! झट्ट सुन्दा आश्‍चर्य लाग्‍न सक्छ । तर, बुढानिलकण्ठमा ४० अनामा बनेको आलिसान महल (घर) बिक्रीका लागि नेपालहोम्स डटकमा लिस्टिङ भएको छ ।

काठमाडौं उपत्यकामा महंगो मूल्यका आलिसान घरहरु धेरै बिक्रीमा राखिएका छन् । अझ कोभिड महामारी र आर्थिक मन्दीपछि महंगा पोपर्टीहरु बिक्रीमा राख्‍ने झनै बढेका छन् । तर, आर्थिक संकटकै कारण खरिदकर्ता भेट्याउन भने मुस्किल नै पर्छ ।

हामीले काठमाडौं उपत्यकामा २० करोड रुपैयाँभन्दा बढी मूल्य तोकेर बिक्रीमा राखिएका पाँचवटा घरको बारेमा जानकारी गराउँदै छौं । यदि तपाईंहरु आलिसान बंग्लो खरिद गरेर बस्न चाहनुहुन्छ भने उपयुक्त विकल्प हुन सक्छन् । 

१) काठमाडौंको उत्तरी भेगमा पर्ने बुढानिलकण्ठमा ४० आना जग्गामा बनेको लक्जरीय घर बिक्रीमा राखिएको छ । दक्षिण मोहडा फर्किएको दुई तले सुविधा सम्पन्‍न आवासीय भिल्लाको मूल्य ३२ करोड रुपैयाँ तोकिएको छ ।

यस आलिसान भिल्लामा बाल्कोनी, सुन्दर बगैँचा, स्विमिङ पुललगायत सुविधाहरु रहेका छन् । भिल्लामा पाँच बेडरुम, लिभिङ, डाइनिङ, किचन, स्टोर रुमलगायत रहेका छन् । घरमा ६ वटा कार पार्किङ गर्न मिल्ने ठाउँ रहेको छ ।

२) ललितपुरको ठैवमा पाँच रोपनी क्षेत्रफलमा बनेको साढे दुई तले विलासी भिल्ला बिक्रीका लागि सूचीकृत गरिएको छ । दक्षिण मोहडा फर्किएको यस घरमा पाँच बेडरुम, हल र पाँचवटा वाथरुम रहेका छन् । यस्तै, ठूलो क्षेत्रफलको आकर्षक बगैंचा समेत छ । यस घरको बिक्री मूल्य २८ करोड रुपैयाँ तोकिएको छ ।  

३) काठमाडौंको धापासीमा तीन रोपनी क्षेत्रमा बनेको साढे दुई तले लक्जरीयस घर बिक्रीमा छ । ६ बेडरुम हलको यस आकर्षक भिल्लाको बिक्री मूल्य २५ करोड तोकिएको छ । घरमा विशाल क्षेत्रफलको आकर्षक बँगैचा रहेको छ ।

४) ललितपुरको सानेपामा २८ आना जग्गा भएको पूर्वी मोहडा फर्किएको साढे दुई तले घर बिक्रीमा छ । सुविधा सम्पन्न यस घरमा पाँच बेडरुम र हल छन् । कमर्सियल प्रयोजनमा पनि लगाउन मिल्ने घरको बिक्री मूल्य २१ करोड रुपैयाँ तोकिएको छ । 

५) काठमाडौंको बालुवाटारस्थित टुँडालदेवीको मुख्य सडकसँग जोडिएको सुविधा सम्पन्न घर बिक्रीमा राखिएको छ । २२ आना जग्गामा बनेको साढे दुई तले घरमा बिक्रीको लागि राखिएको छ । सुन्दर बगैंचासहितको यस घरको बिक्री मूल्य १९ करोड ५० लाख तोकिएको छ ।