पाँच महिनामा कमर्सियल जग्गा खरिद र प्लटिङमा करिव चार अर्ब कर्जा थपियो

काठमाडौं । चालू आर्थिक वर्षको पहिलो पाँच महिनामा कमर्सियल प्रयोजनका लागि जग्गा खरिद तथा प्लटिङमा बैंक तथा वित्तीय संस्थाहरुको कर्जा लगानी ८.६ प्रतिशतले बढेको छ ।

साउनदेखि मंसिरसम्म बैंकहरुले कमर्सियल जग्गा खरिद र प्लटिङ गर्न तीन अर्ब ८९ करोड ७३ लाख रुपैयाँ कर्जा लगानी गरेका हुन् ।

गत आर्थिक वर्षको यसै अवधिमा यस्तो कर्जा प्रवाह दुई अर्ब ४२ करोड ५८ लाख रुपैयाँले ऋणात्मक थियो । नयाँ कर्जा लगानीभन्दा पुरानो कर्जा असुली बढी भएमा समग्रमा कर्जा प्रवाह ऋणत्मक देखिन्छ ।

सुरुवातदेखि ०८० मंसिर मसान्तसम्म जग्गा खरिद तथा प्लटिङ शिर्षकमा बैंक तथा वित्तीय संस्थाको कर्जा लगानी ४९ अर्ब २३ करोड ६० लाख रुपैयाँ पुगेको नेपाल राष्ट्र बैंकले जनाएको छ ।  

चालू आवमा व्यक्तिगत आवासीय घरकर्जा बढे पनि रियल इस्टेट कर्जा भने ऋणात्मक छ । पाँच महिनामा व्यक्तिगत आवासीय कर्जा शिर्षकमा २९ अर्ब ५४ करोड ७१ लाख रुपैयाँ कर्जा थपिएको छ । जुन गत असार मसन्तको तुलनामा ८.५ प्रतिशतले वृद्धि हो । तर, रिय इस्टेट कर्जा भने पाँच महिनामा पाँच अर्ब २१ करोड २७ लाख रुपैयाँले ऋणात्मक देखिन्छ ।

नेपाल राष्ट्र बैंकले अधिकतम दुई करोड रुपैयाँसम्मकाे कर्जालाइ व्यक्तिगत आवासीय कर्जामा गणना गर्दै आएको छ । त्यसभन्दा माथिको घरजग्गा कर्जा रियल इस्टेट शिर्षकमा गणना हुने गर्छ । 

चालू आवको पाँच महिनामा रेसिडेन्सियल रियल इस्टेट कर्जा पनि बढेको देखिन्छ । यो शिर्षकमा एक अर्ब ७५ करोड ७१ लाख रुपैयाँ कर्जा थपिएको छ ।
कमर्सियल कम्पलेक्स तथा रेसिडेन्सियल रियल इस्टेट, आम्दानी सिर्जना गर्ने व्यवसायिक कम्पलेक्स लगायतमा नयाँ कर्जा प्रवाहभन्दा पुरानो कर्जा असुली ज्यादा देखिएको छ ।

पछिल्लो समय बैंकको कर्जाको ब्याजदर घट्दै गइरहेको छ । बैंकहरु पनि सस्तो ब्याजदरका कर्जाको स्किमसहित प्रतिस्पर्धामा उत्रिएका छन् । जसले गर्दा पनि व्यक्तिगत आवासीय कर्जा बढ्दै गइरहेको देखिन्छ ।