नौ महिनामा २७७ युनिट अपार्टमेन्ट बिक्री, पुसमा २८ मात्रै

काठमाडौं । ०८० को पहिलो नौ महिनामा दुई सय ७७ युनिट अपार्टमेन्ट किनबेच भएका छन् । पुस महिना २८ युनिट अपार्टमेन्टको लिखत पारित भएको भूमि व्यवस्थापन विभागले जनाएको छ ।

पुसमा घरजग्गा किनबेचसँगै राजश्‍व असुली पनि बढेको छ । एक महिनामा ४५ हजार २७७ घरजग्गा किनबेच भएका थिए । बढ्दो तरलता, घट्दो ब्याजदरसँगै थलिएको अर्थतन्त्रमा सुधार आउन थालेपछि घरजग्गा कारोबार पनि बढ्न थालेको व्यवसायी बताउँछन् ।

पुसमा सबैभन्दा धेरै काठमाडौंमा १७ युनिट अपार्टमेन्ट किनबेच भएका छन्, जसमा तीन युनिट डिल्ली बजार मालपोतबाट तीन, एक युनिट चावहिलबाट, ६ युनिट कलंकीबाट र टोखा मालपोतबाट सातवटाको लिखत पारित भएको हो ।

ललितपुरको लगनखेल मालपोत कार्यालयबाट ११ युनिट अपार्टमेन्ट किनबेच भएका छन् । पुसमा मोफसलका पोखरा, पर्सा, भद्रपुरलगायत ठाउँमा एउटै अपार्टमेन्ट किनबेच भएका छैनन् । 

यस वर्ष वैशाखमा ३० युनिट, जेठमा २९ युनिट, असारमा ३३ युनिट, साउनमा ३० युनिट, भदौमा ४५ युनिट, अशोजमा ३८ युनिट, कात्तिक र मंसिरमा २२÷२२ युनिट र पुसमा २८ युनिट अपार्टमेन्ट किनबेच भएको तथ्यांक छ ।

नेपालमा काठमाडौं, ललितपुर, भक्तपुर, पोखरा, रुपन्देही, वीरगञ्‍ज, विराटनगर, झापालगायत ठाउँमा बहुतले आवास परियोजना अपार्टमेन्ट बनेका छन् । ठूलो संख्यामा अपार्टमेन्ट निर्माणाधिन अवस्थामा छन् । तर, कोभिड महामारी र मन्दीले सबै परियोजना निर्माण प्रभावित भएका व्यवसायी बताउँछन् ।