यस्तो बन्दैछ रारामा लक्जरी रिसोर्ट, अष्ट्रेलियन लगानी भित्रिँदै (फोटोफिचर)

काठमाडौं । स्वर्गकी रानीको उपमा पाएको नेपालकै उत्कृष्ट पर्यटकीय गन्तव्य रारा ताल क्षेत्रमा लक्जरी रिसोर्ट खुल्ने भएको छ । अष्टेलियन र स्वदेशी एक अर्ब १० करोड रुपैयाँ लगानीमा राराको मुर्माटपमा ६० कोठाको रिसोर्ट खुल्ने भएको हो ।

कर्णाली अञ्‍चलमै पहिलो लक्जरी रिसोर्ट सञ्‍चालनका लागि अष्ट्रेलियाको एक्सपर्ट ग्रुप र रारा होल्डिङस् प्रालिबीच लगानी सम्झौता भएको छ । सम्झौतामा एक्सपर्ट ग्रुपको तर्फबाट बद्रि अर्याल र सञ्जिव शर्मा तथा रारा होल्डिङस् प्रालिका तर्फबाट अभिषेक विक्रम शाहले हस्ताक्षर गरेका छन् ।

मुगुको छायानाथ रारा नगरपालिको मुर्माटपमा ८० रोपनी क्षेत्रफलमा बन्‍ने लक्जरी रिसोर्टमा पहिलो चरणमा करिब ७० करोड र दोस्रो चरणमा थप ४० करोड रुपैयाँ लगानी हुने रारा होल्डिङ्सका शाहले बताए । 

रिसोर्ट वातावरणमैत्री, स्थानीय मुर्मा गाउँको कला संस्कृति झल्किने डिजाइनमा निर्माण गरिने बताइएको छ । यस्तै, स्थानीय स्तरमा उपलब्ध श्रोत तथा साधनको अधिकतम प्रयोग हुने उनको भनाई छ । 

रिसोर्टमा सुइट र डिलक्स गरी दुई प्रकारका कोठाहरु हुनेछन् । भिल्लै भिल्लाहरु हुने रिसोर्ट झट्ट हेर्दा मुर्माकै गाउँजस्तो देखिने छ । 

रिसोर्टमा पहिलो चरणमा ४० कोठा तयार हुनेछन् । दोस्रो चरणमा २० वटा कोठा थपिने एक्सपर्ट ग्रुपका बद्री अर्यालले बताए । चिसो तातो पानीको सुविधा हुनेछ । रिसोर्टमा रेष्टुरेन्ट, १०० जना क्षमताको मिटिङ हल, साउना, स्टिम, हेल्थ क्लब लगायत लक्जरी रिसोर्टमा हुने सबै सुविधाहरु उपलब्ध् हुने बताइएको छ ।  

समुद्र सतहदेखि ३७ सय मिटर उचाईमा निर्माण हुने यो रिसोर्टबाट रारा ताल र त्यस क्षेत्रका हिमालहरुको उत्कृष्ट दृश्य देखिनुका आसपासका क्षेत्रहरुको दृश्यावलोकन समेत गर्न सकिनेछ । रिसोर्टका सबै कोठाबाट रारा तालको सुन्दर दृश्यहरु देखिनेछन् । 

तालबाट हिँडेर एकदेखि डेढ घण्टामा पुगिने मुर्मा टपबाट राराको पुरै भेग देखिन्छ । रिसोर्टमा स्थानीयलाई रोजगारीमा प्राथमिकता दिइने एक्सपर्ट ग्रुपका सञ्‍जिव शर्माले बताए । प्रकृतिप्रेमी खर्चालु पर्यटकलाई लक्षित गरेर रिसोर्ट निर्माण थालिएको हो, जहाँ पर्यटकको बसाइ लम्बाउने उद्देश्य राखिएको छ । 

‘यो कर्णाली प्रदेशकै पहिलो लक्जरी रिसोर्ट हुनेछ, परियोजना निर्माण सुरु गर्नका लागि सबै प्रकृया लगभग अन्तिम चरणमा पुगेका छन्’ शाहले भने, ‘यस सम्झौतासँगै हामी भोलिदेखि नै निर्माण प्रकृयालाई तीब्रता दिनेछौँ र आगामि १८ महिनाभित्र निर्माण सम्पन्‍न गर्ने लक्ष्य लिएका छौं ।’ 

एक्सपर्ट ग्रुपको अष्ट्रेलिया र नेपालमा शिक्षा र जलविद्युत क्षेत्रमा लगानी रहेको छ । यस सम्झौतासँगै, एक्सपर्ट ग्रुपले पर्यटन क्षेत्रमा पनि लगानी विस्तार गरेको छ ।