नापजाँच भएर पनि छुटपुट भएकाे जग्गा दर्ता गर्न खुला

काठमाडौं । सरकारले नापजाँच भएर पनि विभिन्‍न कारणले दर्ता गर्न छुटेको जग्गा दर्ता गर्न खुला गरेको छ । भूमि व्यवस्था मन्त्रालयले शुक्रबार राजपत्रमा सूचना प्रकाशित गरेर छुटपुट जग्गा दर्ता गर्नका लागि खुला गरेको हो ।

मालपोत नियमावली, २०६३ को नियम ४ (क) को उपनियम (१०) को प्रयोजनका लागि जग्गा (नापजाँच) ऐन, २०१९ बमोजिम नाप नक्सा भएको तर दर्ता गर्नसम्म छुट भएका जग्गा दर्ता गर्न चाहने सम्बन्धित (भोगचलन गरेको व्यक्ति÷परिवार) जग्गावालाले सम्बन्धित मालपोत कार्यालयमा निवेदन दिन सक्ने बताइएको छ ।

यस सम्बन्धमा यसअघि नै निवेदन परी फर्छ्यौट हुन बाँकी रहेका पुराना निवेदन फर्छ्यौट गर्ने म्याद दुई वर्ष तोकेको राजपत्रमा प्रकाशित सूचनामा उल्लेख छ । 

यसअघि पनि सरकारले पटक पटक छुट जग्गा दर्ता गर्न खुलाउने र बन्द गर्ने गर्दै आएकोमा पछिल्लो आठ वर्षदेखि पुरै रोक लगाएको थियो । जसकारण जग्गाको नापजाँच भएको र भोगचलन गर्दै आएका जग्गाधनीहरू मर्कामा परेको गुनासो गर्दै आएका थिए ।

२०१९ सालमा जग्गा नापँजाच ऐन आएपछि २०२१ सालदेखि २०५५ सालसम्म देशभरी जग्गा नापँजाच गरिएको थियो । यस्तो दर्ता गर्न छुटेको जग्गा काठमाडौं उपत्यकासहित देशैभरी रहेको बताइन्छ ।