देशभरका रियल इस्टेट कम्पनीहरुले चुक्ता पूँजी दुई खर्ब ७८ अर्ब रुपैयाँ रहेको र यस क्षेत्रमा बैंकको लगानी करीव दुई खर्ब ५० अर्ब रुपैयाँ रहेको घरजग्गा महासंघले जनाएको छ ।
काठमाडौं । नेपाल जग्गा तथा आवास विकास महासंघले रियल इस्टेट कन्फ्रेन्स आयोजना गर्ने भएको छ । यही २३ र २४ वैशाखमा आयोजना गर्न लागिएको कन्फ्रेन्समा घरजग्गासँग सम्बन्धी दुई सय जनाको सहभागिता रहने बताइएकोछ ।
नेपाल इन्स्टिच्युट अफ अर्बन एन्ड रिजनल स्टडिज (निअर्स)सँगको सहकार्यमा आयोजना हुन लागेको सम्मेलनमा विदेशी वक्ता समेत सहभागी हुने आयोजकले जनाएको छ । सम्मेलनमा ‘विश्व परिदृश्यमा रियल इस्टेटको अवस्था र नेपालले लिनुपर्ने कार्यदिशा’ बारेमा स्वदेशी तथा विदेशी विज्ञ र सहभागीहरुबीच खुला छलफल हुनेछ ।
मन्दीकै बिच आयोजना गर्न लागिएको सम्मेलनमा प्राप्त अवसरलाई कसरी सदुपयोग गर्न सकिन्छ भन्ने बारेमा रियल इस्टेट क्षेत्रमा ख्यातिप्राप्त विदेशी विज्ञहरुको अनुभव र सुझाव प्राप्त हुने अपेक्षा छ ।
सम्मेलनमा सहभागी हुनका लागि रजिष्ट्रेसन फि नौ हजार रुपैयाँ तोकिएको छ । रियल इस्टेट क्षेत्रको विकासका लागि नीति निर्माता, प्रशासक र व्यवसायीको भूमिका, अन्तर्सम्बन्ध र सहकार्यबारे प्रष्ट कार्यदिशा तयार गर्न पनि सम्मेलनले सहयोग पुग्ने विश्वास छ ।
सम्मेलनमा नेपालको घरजग्गा बजारमा विदेशी लगानीका लागि लिनुपर्ने रणनीतिका विषयमा पनि छलफल हुने छ । यस्तै, सफल रुपमा घरजग्गा एजेन्सी र एजेन्ट सञ्चालन सम्बन्धी सत्र पनि चल्नेछन् ।
सिंगापुरले सहरी विकासमा गरेको प्रगति र त्यसको गुरुयोजनाको विषयमा पनि विदेशी वक्ताले सत्र सञ्चालन गर्नेछन् ।
सम्मेलनको मुख्य उद्देश्यहरुमा स्वदेशी तथा विदेशी विज्ञ र व्यवसायीहरुबीच अनुभव साटासाट, घरजग्गा उद्योगको ट्रेन्ड एनलाइसिस, पोलिसी लविङ, नेटवर्क विस्तार, अन्तर्राष्ट्रिय प्राक्टिसबारे अनुभव शेयरिङ रहेको छ ।
देशभरका रियल इस्टेट कम्पनीहरुले चुक्ता पूँजी दुई खर्ब ७८ अर्ब रुपैयाँ रहेको र यस क्षेत्रमा बैंकको लगानी करीव दुई खर्ब ५० अर्ब रुपैयाँ रहेको घरजग्गा महासंघले जनाएको छ । कुल ग्राहस्थ उत्पादनमा यस क्षेत्रको योगदान करीव १० प्रतिशत रहेको छ । महासंघका अनुसार, समग्र रुपमा घरजग्गाको कारोबारबाट वार्षिक करिव ४० अर्ब रुपैयाँभन्दा बढी राजश्व उठ्दै आएको छ ।